Shillong, Risaw 31
U Nongïalam ka NPP uba dei u MLA na Rongara Siju, u Rakkam A. Sangma u la ong ba ki paidbah ha Gambegre ki la sngewthuh, bad kim kwah ban ïoh MLA da kiba shong ha ka Liang Pyrshah.
U la kam ba ka kyrtong jong ka NPP, kaba dei ka kurim u Myntri Rangbah u Conrad K Sangma, ka Dr. Mehtab Chandee Sangma kan jop donburom ha ka ilekshon shiteng samoi na Gambegre.
“Ha ka ilekshon MLA 2023, ki paidbah ka Gambegre kim pat tip mano ban thaw Sorkar, ki la jied ïa u Saleng A. Sangma uba hap shong ha ka Liang Pyrshah, mynta ki paidbah ki la ïoh ïa ka lad ban jied ïa ka MLA ka ban don hapoh ka Sorkar”, u la ong bad bynrap ba shispah na ka shispah u thikna ba ka kyrtong ka NPP kan jop ïa ka ilekshon.
Haba kylli, u la ong ba ha ka ilekshon kam bha ban kheiñ sting ne ban ong mano ki ban long ba ar ba lai, hynrei baroh ki kyrtong ki long kiba donkam bad ki don ïa ki nongrim ba kin ïeng bad kren.
“Ki nongmihkhmat barabor kim ju kwah ban shong ha ka Liang Pyrshah kumjuh ruh ki nongjied, baroh ki kwah ba u MLA un don ha ka Sorkar khnang ba kin ïoh shibun ki jingmyntoi”, u la ong.
Ha kajuh ka por u Rakkam u la ong ba ki jingkynnoh jingkynthoh laiphew bad ka jingïatei pop markylliang ki dei ka bynta jong ka ilekshon, hynrei ha kaba khatduh dei ki paidbah kiba bishar bad rai.
Ka ilekshon jied MLA ha Gambegre kan long ha ka 13 tarik mynta u Naiwieng bad ka jingñiew ïa ki vote kan long ha ka 23 tarik jong ujuh u bnai.
Ha kane ka ilekshon ki don hynriew ngut kyrtong, kita ka kurim u Myntri Rangbah, ka Dr. Mehtab Chandee A Sangma kaba la thep kyrteng kum ka kyrtong ka National People’s Party (NPP), u Jingjang M Marak uba dei u kyrtong ka Indian National Congress (INC), ka Sadhiarani Sangma kaba dei ka kyrtong ka All India Trinamool Congress (AITC), nalor u Bernard N Marak kum u kyrtong ka Bharatiya Janata Party (BJP). Ki kyrtong shimet ki long u Sengkrabirth M Marak bad Jerry A Sangma.
