Mumbai, Risaw:
Ki pulit ka Nanded ha Maharashtra ki la ïoh ban kurup T.1.05 klur tyngka na kawei ka kali ha Nanded distrik ha ka por ba la pyntreikam ïa ka Model Code of Conduct kaba la pyntreikam na ka bynta ka ilekshon Assembly 2024 ha Maharashtra ha u bnai ban wan, ong uwei u heh sorkar, kumba la ïathuh ka lad pathai khubor, ha ka sngi Balang. Ka kynhun jong ki pulit ka la lap bad ïohbat ïa kawei ka kali ha ka Check-Post kaba don ha ka thaiñ Bhagyanagar jong ka Nanded bad haba la khmih bniah la lap ïa ka pisa ha katei ka kali, la ong u heh sorkar.
“Ngi dang pynshisha halor ban tip ïa ka tynrai ba kane ka pisa ka wan bad nangno la leit rah ïa ka. Ngi la ïapynbeit ruh bad ka Bank,” la ong u Superintendent of Police jong ka Nanded u Abinash Kumar. Ka ilekshon Assembly jong ka Maharashtra kaba don 288 ngut ki dkhot kan long ha ka 20 tarik u Naiwieng, bad ka jingñiew vote kan long ha ka 23 tarik, Naiwieng, la ïathuh ka tyllong khubor. Kane ka jingjia ka la jia katto katne sngi hadien ba ki pulit ka Mumbai ki la ïoh ban kurup ïa ka pisa kaba `.20 lak na kawei ka kali ha ka thaiñ Chembur jong ka nongbah bad ki la kem ym duna ïa ki 5 ngut ki briew na ka bynta ban kylli jingkylli bad tohkit ïa ki ha ka Sngi Thohdieng jong ka taïew ba la lah.
“Ha ka jingkhynra ha ka thaiñ Chembur ha Mumbai, ki pulit ki la lap ïa ka pisa kaba T.20 lak na kawei ka kali. Hadien ba la ïoh kurup ïa ka pisa, ki pulit jong ka Tilak Nagar ha Mumbai ki la ïakynduh ruh ïa ka tnad Income Tax,” la ong ka kyrwoh ba la phah hashwa jong ki pulit.
Hadien ba la dep ban pynbna ïa ki tarik ban pynlong ïa ka ilekshon ha Maharashtra, la pyntreikam ïa ka Model Code of Conduct. Hapoh ka jingtreikam jong kane ka kyndon, ki briew kiba kit pisa palat ïa ka T.50,000 ki dei ban don ïa ki kot ki sla kiba biang bad kiba ai jingbit ba kin rah, katba ym donkam jingthoh na ka bynta ka jingrah ïa ka pisa kaba hapoh kane kaba la buh.
