Shillong, Risaw 31
Ki nongñiah kali kamai ki la kyntu ïa ka Sorkar ba kin weng noh ïa ki harijan kiba sah ha Them Ïew Mawlong ba kin shngaiñ haba ka Sorkar kan sdang ban phah ïaid ïa kali na ïew Mawlong sha Bimola.
Kane ka jingplie biang ïa ka jingïaid kali na Ïew Mawlong sha Bimola napdeng surok ba sah ki harijan kan sdang naduh ka 4 tarik u bnai ban wan kata naduh 8:00 baje mynstep haduh 4:00 baje janmiet.
Kane ka jingplie biang ïa ka surok ka dei hadien hynriew snem ba la khang na ka jingmih ka huri-hura hapdeng ki nongñiah bos saw bad ki harijan kiba sah ha Them Ïew Mawlong kaba la jia ha u snem 2018.
Kane ka jingphah ïaid ïa ki kali na jaka sah ki harijan ka long ban pyllait ïa ka jingdheng kali ha sor Shillong khamtam na Anjalee Pump kaba ju dheng kali man ka por namar ki kali ki rung bad ki mih na kane ka jaka.
Haba u nongthoh khubor u la ïoh ban ïakren ïa ki nongñiah kali kamai kiba ïeng ha Ïew Mawlong kiba dei na Laitumkhrah, Pynthorumkhrah, Nongmen-song, Tynring, Mawdiangdiang bad ki ‘riew paidbah kiba wan thied jingthied, ki la ai khublei ïa ka Sorkar kaba la shah biang ban ïaid kali na jaka sah ki harijan namar kan pyllait ïa ka jingsahkut ki kali lada leit phai biang na Anjalee.
Ha kajuh ka por ki la pynpaw ba ka Sorkar ka dei ban weng beit ïa kine ki harijan kiba sah ha Them Ïew Mawlong namar kim pat shngaiñ ban ïaid na kane ka jaka.
Ha kawei ka liang pat ki la pynpaw ka jingbym sngewïahap ba ka Sorkar kan shah ban ïaid tang haduh 4 baje na kane ka surok naba kane kan ktah jur namar ka por 4:00 baje janmiet ka dei kaba jur bha ka jingdheng kali.
Ki la ïathuh ba ka don shisha ka jingdheng kali lada baroh ki kali rit bad ki bos Smit ki la ïa mih lang ha kajuh ka por ban ïaid na Anjalee Pump hynrei lada shah ban ïaid na Bimola kan pyllait shibun ïa ka jingdheng kali.
Na ka liang ki nongñiah kali kamai na Tynring kiba ïeng syndah bad ki harijan ki la pynpaw ba kim da shngaiñ ban ïeng haduh janmiet hynrei haba la plie ïa kane ka surok ki kwah ban ïaid da kaba beit bad ryntih khlem don ka jingpynthut.
Katba kiba shong dukan kiba wan thied jingthied na Ïewduh kiba shong kali na Ïew Mawlong ki la pynpaw ba kim pat sngew shngaiñ ban ïaid na surok kaba sah ki harijan namar kine ki briew ki dang leh baheh haduh mynta.
