Shillong, Risaw 31
U Myntri ba khmih ïa ka pule-puthi ha ka Jylla, u Rakkam A. Sangma u la ong ba ka Samagra Shiksha Abhiyan (SSA) ka dei ka program jong ka Sorkar pdeng, bad kam lah ban long ban shu pynskhem (regularize) ïa ka kam ki nonghikai, namar ha Meghalaya la bynta la kajong ïa ki nonghikai bad nongtrei SSA mynta lah slem bah bad ka jingpyntreikam ka pher na kiwei ki Jylla.
U la ong ba ha Meghalaya ki don palat 13,000 ngut ki nonghikai SSA, mynshwa ka jingsiew tulop ïa ki nonghikai SSA ka dei 90/10 na ka Sorkar Pdeng bad ka Sorkar Jylla, katba mynta pat ka jingsiew la pynbeit 70/30, bad ka Sorkar India ka thmu pynbynta noh mar 50/50 ka jingsiew tulop sha ki nonghikai.
“Ban pynskhem (regularize) ïa ka kam ki nonghikai SSA kan ym lah ban long, bad khnang ban ailad ïa ki nonghikai, ka Sorkar ka la pynjynsur ïa ka rta thep kam ki nonghikai SSA sha ka 45 snem ba kin lah ban thep ïa ki kam ba lait ha ki skul Sorkar”, la ong u Rakkam.
U la ong ba ka Sorkar ka la shim khia bha ïa ka jingdonkam ki nonghikai SSA, bad ka pyrshang ruh kumno ban kyrshan bad ïarap ba ka kam jong ki kan shngaiñ. U la ong shuh shuh ba ka skhim SSA kaba mynta kan sa kut noh, bad ka Sorkar kan hap ban shim ïa ka jingkitkhlieh ban ym sangeh ka kam jong ki nonghikai.
“Ka Sorkar India ka lah ban pynduh noh ïa ka skhim SSA, hynrei ka Sorkar Jylla kan ym lah ban shu ieh noh ïa ki nonghikai hynrei ka hap ban shim ïa ka jingkitkhlieh. Ngim tip da kano ka lynti ngin leh ne ki polisi aïu ba ngin wanrah ngin hap ban shong pyrkhat. Kumba ka long mynta ki nonghikai SSA ki dei shi bynta jong ka tnat pule puthi”, u la ong.
U Rakkam ha kawei ka liang u la ïathuh ba kin don ki kam hikai kumba 600 tylli hapoh ki skul Sorkar ki ban sa lait, bad shen yn sa pynbna (advertisement) noh, bad ki nonghikai SSA kiba la pyndep ïa ka MTET ki lah ban aplai.
Lah ban kdew hangne ba ka Sorkar Jylla ha u Rymphang 2022, ka la pynjynsur ïa ka rta jong kiba thep kam hikai na ka 32 snem sha ka 37 snem, bad ha ka 25 tarik u Risaw mynta u snem ka Sorkar ka la rai ban pynjynsur kyrpang ïa ka rta thep kam ki nonghikai SSA sha ka 45 snem, da kaba pynshong nongrim ïa ka ka jingshakri ba ki la ai da ki bun snem.
