Shillong, Risaw 31
Uwei u briew ba la tip kum u ‘Bahdeng’ u la phet krad na Lad Nongkrem ryngkat ar tylli ki masi kaba u la thep hapoh ka kali ka jong u, khlem da siew pisa satia.
Katkum ka khubor kaba la ïoh na ki pulit la ong ba uwei u nongshong shnong na South West Khasi Hills u la ujor sha ki pulit ba ha ka 21 tarik mynta u bnai ha ka por kumba 11.40 mynstep, uwei u briew ba la tip kum u ‘Bahdeng’ u la thep ar tylli ki masi hapoh ka kali ka jong u ha Lad Nongkrem, Shillong, da kaba leh mynleh ban thied ïa ki ha ka dor kaba T.1.02 lak, hynrei u la phet bak na katei ka jaka khlem da siew satia ïa ka pisa.
Ha kaba ïadei bad kane, na ka liang jong ki pulit ki dang pynlong ka jingtohkit bad ban thwet ïa utei u briew uba la kynnoh rah tuh ar tylli ki masi.
Ha kawei pat ka khubor jong ka jingshah tuh masi, u Ivan W Sangma u la ai ka jingujor sha ki pulit ba ha ka 28 tarik mynta u bnai ha ka por kumba 12.30 shiteng synñia, ki runar bym lah ban ithuh, ki la tuh ïa ki saw tylli masi jong u, na ka sem masi kaba don ha ka shnong Rongreng Bhaija ha East Garo Hills.
