Shillong, Risaw 31
Ka Sorkar Jylla ha ka Sngi Palei ka la pynkup burom ïa u Bah Francis A Khongwar, uba dei uwei na ki nongthoh khubor uba la rim ha ka jylla bad noh synñiang shi kat dei ha ka kam pathai khubor.
U Chief Secretary ka Jylla, Bah D.P Wahlang, u la aiti ïa ka cheque kaba T.1 lak sha u Bah Khongwar kum ka dak jong ka jingsngewnguh ïa ka jingtrei shitom ka jong u.
Kum ban shu kdew, ka Sorkar Jylla lyngba ka tnat Directorate of Information and Public Relations, dang shen ka la pynkup burom ïa ki 8 ngut nongthoh khubor kiba la trei slem ha ka kam, ha ka Meghalaya Media Meet 2024 kaba la long ha Hotel Vivanta, Shillong.
Ha katei ka jingïalang u Myntri Rangbah ka Jylla u Conrad K Sangma u la pynbna ïa ka Special Grant kaba mar T.1 lak ïa kitei ki nongthoh khubor kum ka jingithuh ïa u synñiang u bynhei ha ka ban pynwandur ban pynsaphriang ïa ki jingtip sha ki paidbah ka Meghalaya.
U Bah Francis A Khongwar u la sdang ïa ka kam thoh khubor naduh u snem 1984 kum u Reporter jong ka kot khubor Khasi ‘Dongmusa’ bad hadien kane u la leit ban trei noh ha ka Press Trust of India, Shillong, kum u Transmission Operator.
Ha ka jingïaid ki snem, u la noh synñiang shi katdei sha ki kynhun pathai khubor kiba kynthup ïa u Apphira, Nation Builder, Mawphor, Kynjat Shai bad kiwei kiwei.
