Shillong, Risaw 31
U Lamphang Ïingdorbar Thawaiñ ka Jylla, u Thomas A. Sangma lem bad Commissioner & Secretary u Dr. Andrew Simons, Secretary u Malthus Sangma bad kiwei ki ophisar ka Assembly Secretariat, ki la leit ban jurip ïa ka jingpyntrei ïa ka Ïingdorbar bathymmai ha Mawdiang-diang, ha kaba u la ïakren ruh bad ki ophisar jong kiwei ki tnat kiba don bynta ha ka jingtrei.
Halor katei ka jingleit jurip, u Lamphang u la pyntip ba ka jingtrei ka la ïaid katkum ka Standard Operating Procedure (SOP) ban pynthikna ba kan don ka jingshngaiñ na ka bynta kiba trei bad kumjuh ka jingshngaiñ ïa ka jingtei.
Haba pynpaw ka jingsngewhun ïa ka rukom trei, u la ong ba katei ka kam ka la kham slem kumba shibnai ei-ei bad banjur ba dei ban pyndep ha ka por ba la pynbeit thymmai, bad yn ym pynjlan shuh ïa ka por ban pyndep.
“Ka jingtei ïa kane ka ïing ka la poi sha ka bynta kaba khatduh, kumba 90% ka jingtrei ïa ka right wing, left wing, bad ka ophis u Lamphang, ka kamra u Myntri Rangbah, ka kamra Secretariat, bad ka library la jan dep artat. Ka bynta jong central wing, ba kynthup ïa ka main hall ka dang sah”, u la ong.
U la ïathuh ba u kontraktor bad ka PMC ki la pynthikna ba ka jingbuh ïa ka tnum pyllun (dome) yn pyndep noh hapoh 45 sngi.
