Shillong, Risaw 31
Ka Sorkar Meghalaya ha ka jingpynbna ka la thaw ïa ka skhim ban buh ïa ka pisa ha ka bor jong ki Deputy Commissioner lyngba ki District Task Force na ka bynta ban pyntreikam ïa ka Meghalaya Residents Safety and Security Act (MRSSA) 2016 ha ka Jylla.
Khnang ban pyntreikam ïa ki kyndon jong ka aiñ, la thaw ïa ki District Task Force ha kaba ki Deputy Commissioner kin dei ki Chairperson bad ki Additional Deputy Commissioner/Asst Commissioner kum ki Secretary. Ki dkhot jong ka Task Force pat ki kynthup ïa ki Superintendent of Police, Inspector ka Supply, Inspector ka Labour, Inspector (Infiltration Branch), Anti-Infiltration Directorate, ki nongmihkhmat na ki Autonomous District Council bad ar ngut ki non-official member ki ban dei na ki bor shnong. Ka jingthmu jong ka Meghalaya Residents Safety and Security Act (MRSSA), 2016 ka long eh ha kaban pynthikna ïa ka jingpynkhlaiñ ïa ka jingpeit bniah ïa ki nongshong wai bad ban pynthikna ïa ka jingshngaiñ bad jingïada jong ki nongshong shnong ka Jylla da kaba khanglad ïa ki kynhun bymman ban ïoh jaka rieh ha ka Jylla kaba lah ban ktah ïa ka suk ka saiñ, ban pynshisha bad teh kyndon ïa ki nongshong wai kiba sah ha ki ïing ba la ai wai ha ka Jylla, ban thaw ïa ki District Task Force bad ki Facilitation Centre, ban pynsuk ïa ka jingpyntreikam kaba paka ïa ki aiñ bapher-bapher bad na ka bynta ka jingshngaiñ jong ki nongshong shnong.
