Nongpoh, Naiwieng 01
Ka sem jong ka National People’s Party (NPP), Nongpoh Block ka la nang stait bad pra syndon phum ha kaba lai ngut ki nongïalam ba hakhmat jong ka seng kaba bat ïa u lakam synshar ha ka Jylla, ki la mih noh bad leit pynïasoh ïalade sha ka Congresss ha ka jingïalang kaba la long mynta ka sngi ha Sajer, Nongpoh.
Kitei ki lai ngut ki nongïalam ba hakhmat jong ka NPP, Nongpoh konstitwensi kiba la mih ban pynïasoh noh sha ka Congress lem bad 200 ngut ki nongïalam na ki Zone, Circle bad Unit bapher-bapher, ki kynthup ïa u Bah Minsing Makri, Adviser ka NPP Nongpoh Block, u Bah Stoin R. Syngkli, Working President ka NPP Nongpoh Block lem bad u Bah Lawrence Nongrum, Secretary ka NPP Nongpoh Block.
Ïa kitei ki nongïalam barim ka NPP la pdiang sngewbha sha ka Congress da u Bah M.G. Kharshanlor, President ka Ri-Bhoi District Congress Committee (RBDCC) ha ka jingdon lang ka Kong Joplin Scott Lyngdoh, President ka Meghalaya Pradesh Mahila Congress (MPMC), u Bah Rocky A. Marweiñ, Vice President ka RBDCC, u Bah S.W. Mallai, President ka Nongpoh Block Congress Committee (NBCC), u Rev. P.W. Pnar, Adviser ka NBCC lem bad kiwei-kiwei.
Haba kren ha kane ka sngi, kitei lai ngut ki la ïathuh ba ka ka daw kaba la pynlong ïa ki ban mih noh na katei ka seng ka dei halor ka jingshah leh bym suitñiew ha ki nongïalam ba hakhmat ka seng, ki bym shym la sngap satia ïa ki kum ki nongïalam na ka bynta ban wanrah ïa ka roi ka par na bynta ki paidbah.
Ki la ïathuh ruh ba kumba ki dei ki nongïalam barim jong ka Congress naduh ka por jong u Dr. D.D. Lapang, ki sngewkmen ban rung biang sha kane ka seng kaba dei tang ma ka, ka seng kaba ïeng ban ïakhun ïa ka khia ka shon bad ka jingeh jong ki paidbah, khamtam kum ka jaidbynriew rit paid bad kular ruh ba nangne shakhmat, kin ïai trei shit rhem ban nang pynkhlaiñ shuh ïa ka seng ym tang ha Nongpoh konstitwensi, hynrei ha Ri-Bhoi hi baroh kawei.
Na ka liang jong ki nongïalam ka Congress pat ba kynthup naduh u Bah M.G. Kharshanlor, ka Kong Joplin Scott Lyngdoh bad u Bah Rocky A. Marweiñ da ka mynsiem jong ka jingkmen ki la pdiang sngewbha ïa kitei ki lai ngut ki nongïalam ba hakhmat jong ka NPP lem bad ki nongbud jong ki bad pynpaw ba wat lada ki MLA ki la mih noh na ka seng ruh, hynrei ka seng ka dang ïoh mynsiem bad dang khlaiñ kat nang mih ki sngi.
Kitei ki nongïalam ki la pynpaw ruh kumba ka ilekshon MDC ka la nang jan, ka seng ha kine ki khyndiat por ki ban wan, kin nang bteng ban pdiang shuh-shuh ïa kiwei de ki nongïalam bad nongbud jong kiwei de ki seng saiñ hima sima ha baroh 5 tylli ki konstitwensi jong ka Ri-Bhoi District ban pyntikna ba ki kyrtong jong ka seng kin ïoh ïa ka jingjop donburom.
