Shillong, Naiwieng 01
U Bah Sniawbhalang Dhar uba dei u Symbud Myntri Rangbah ba khmih ïa ka Kam Pynroi sor u la ong ba ka Sorkar ka la dep ban ithuh lai tylli ki jaka na ka bynta ban pynkynriah noh ïa ka marten na Mawïong, hynrei u la ïathuh pat ba ka daw ba haduh mynta ym pat lah ban pynkynriah ka dei namar ka jingbym pat ïohlad ban pynlong ïa ka jingpynsngew paidbah.
Katkum ka jingïathuh u Myntri ki jaka ba ka Sorkar ka la ithuh ki don lai tylli, ba kynthup ha Nonghali, Umraleng bad Kyrdemkulai, bad kaba sah ka long ïa ka Shillong Municipal Board (SMB) bad ka Meghalaya State Pollution Control Board (MSPCB) ba kin leit pynlong ïa ka jingpynsngew paidbah lane ka ‘public hearing’ ryngkat bad ki bor district.
Ka jingpynkynriah ïa ka jaka bret jaboh (marten) kaba don ha Mawlai Mawïong haduh mynta ka la sahteng, wat hadien ba la mih ka jingdawa ba dei ban pynkynriah noh namar katei ka jaka kam long shuh ban pynshlei da ki synrum kiba la kit na kylleng ka sor Shillong bad khapsor.
Haba kylli, u Bah Dhar u la kubur ba ka marten kaba don mynta ha Mawïong ka la ap jingma, hynrei u la ong, “Ka jingeh ka dei namar haba ka Sorkar ka la ïoh ïa ka jaka ki trai shnong pat ki pynpaw ka jingpyrshah”.
Lah ban kdew ba ha u snem ba la dep ki paidbah ka shnong Mawlai ki la pynpaw ka jingsngewkhia ïa ka jingshlei jong ka jaka theh jaboh ha Mawïong, bad na ka liang ka Seng Samla Mawlai Pyllun (SSMP) ka la dawa na ka Sorkar ban wad noh da kawei ka jaka theh jaboh bathymmai, namar ka marten kaba la pyndonkam mynta la palat 85 snem ka lah shlei.
Ha kaba ïadei bad ka jaka bret jaboh na ka bynta ka sor Jowai, kaba la shah ktah bha ha u snem 2022 namar ka jingbym don ka jaka bret jaboh kaba paka, u Bah Dhar u la ïathuh ba ka tnat kan pynmih biang ïa ka Expression of Interest (EOI) kaba thymmai, hadien kata yn sa wad ïa ka jaka.
