Shillong, Naiwieng 01
Ki Nongtrei ka NEHU kiba don ha ka lama jong ka North Eastern Hill University Non-Teaching Staff Association (NEHUNSA), ki la rai ban pynlong da ka jingsangeh treikam ba khlem buh por naduh ka 4 tarik Naiwieng kum ka dak ka jingpyrshah ïa ka jingpynslem palat pud ban kyntiew kyrdan bad thung kam thymmai ha ki kam kiba lait kiba la dep ban pynbna naduh ka 3 tarik Naiwieng 2023.
Kane ka rai jong ka NEHUNSA ka la mih ha ka jingïalang jong ka General body kaba la long ha ka 29 tarik Risaw, 2024.
Ha ka kyrwoh ba la pyllait hynne ka Sngi Thohdieng, u President ka NEHUNSA, Dr. W.R Synrem u la ong ba na ka por sha ka por la ju phah ïa ki jingthoh sha ki bor ba dei khmih ban pynkloi ïa ka jingthung kam, hynrei kine ki jingthoh imat ki poi sha ki shkor kiba kyllut.
La ong ba ka eksam thung kam ka dei kaba hap ban pynlong da ka National Testing Agency (NTA) hynrei sngewsih, ka NTA ka la phah jingthoh sha ka University ha ka 16 tarik Naitung, 2024 ba kam lah satia ban pynlong ïa kane ka eksam thung kam.
U Dr. Synrem u la ong ba ka dei ka kamram jong ka University ba kan pynmih ïa ka Expression of Interest (EOI), ha kaba ka la leh ruh ïa kane da kaba buh ïa ka sngi ba khatduh ban aiti ïa ki kot ki sla ha ka 30 tarik Nailur 2024. Hynrei, mynta wat hadien shibnai ym shym la don kawei ruh ka Agency ka ban ïoh shimti ïa ka kam ban pynlong ïa kane ka eksamin thung kam.
U Dr. Synrem u la ong ba ka NEHUNSA ka la ai por khatduh ïa ki bor ba dei khmih ba kin pynmih noh ïa ka syllabus bad ka tarik ban thoh ïa ka eksam, la kumno-kumno ha shwa ban kut u Risaw 2024.
“Namar ka jingbym lah ban pynmih ïa ka jingpynbna, la pynbor ïa ngi ban pynlong da ka jingsangeh treikam ba khlem buh por naduh ka 4 tarik Naiwieng, 2024 ban pynbor ïa ki bor ba dei khmih ba kin pynurlong ïa ki jingdawa ba ngi la buh,” la ong u Dr Synrem.
