Shillong, Naiwieng 01
Lehse ka dei ka jingbym lah peitngor ne ka dei ka jingkhaiñ palat ban peitngor namar ka jingtreikam ka Model Code of Conduct ha kaba ki bor pahara kim pat ïoh bat ïa kiba rah pisa bun ha Gambegre konstitwensi namar haduh mynta dang ïoh kurup tang ka kyiad bad u drok.
Hapdeng ka jingpeitngor bad jingpyntreikam ïa ki kyndon pyrkhing ilekshon ha Gambegre, ki bor ba dei khmih ki la ïoh kurup ïa ka kyiad kumba 1179.27 litar kaba kot kumba T. 1 lak, nangta u drok kumba 81 gram uba shongdor kumba T. 2.4 lak la ïoh ban kurup.
Hynrei ïa kiba rah pisa palat pud bad kito kiba thmu ban pyndonkam ïa ka pisa na ka bynta ka ilekshon MLA shiteng samoi ha Gambegre, ym pat ïoh ban kurup na ki briew kiba lah ban rah pisa na ka bynta ban kyrshan ïa kino-kino ki kyrtong kiba ïakhun ha kane ka ilekshon shiteng samoi.
Katkum ka jinglum jingtip, ki suloi kiba la leit ban aiti sha ki bor district bad ki bor pynïaid ilekshon ki don tang 655 tylli na ki 3,567 tylli ki suloi kiba la ïoh laisen.
Ki bor pahara ki la nang pynkhlaiñ ïa ka jingpeitngor ha Gambegre konstitwensi kaba don 51 tylli ki jaka thep vote ha kaba ki paidbah kin sa jied MLA thymmai ha ka 13 tarik bad ka jingñiew vote kan long ha ka 23 tarik Naiwieng.
Ki don 6 ngut ki kyrtong kiba ïakhun ha kane ka ilekshon shiteng samoi ha Gambegre kynthup ïa ka kurim u Myntri Rangbah ka Dr. Mehtab Chandi A Sangma.
