Shillong, Naiwieng 01
Ka Federation of Khasi Jaiñtia and Garo People (FKJGP), Sengkmie ka pynpaw ka jingpyrshah jur ïa ka jingthmu ka Sorkar Jylla halor ka hukum ba la pynmih da ka ophis Deputy Commi-ssioner, East Khasi Hills ha ka 30 tarik Risaw, 2024 ban plie noh ïa ka surok na Them Ïew Maw-long sha Bimola naduh ka 4 tarik Naiwieng, 2024.
“Ka jingleh jong ka Sorkar ka dei tang ka buit ban pynthame ïa ki paidbah nongshong shnong jong ka Bri u Hynñiew-trep ban pynslem ha ka ban pynkynriah noh ïa ki briew kiba sah be-aiñ ha Them Ïew Mawlong,” ong u Vice-President ka seng, Bah Kitboklang Nongphlang ha ka kyrwoh khubor.
U la ong ruh ba ki paidbah ka Bri u Hynñiewtrep na ka por sha ka por ki la pynpaw ïa ka jingdonkam ban pynkynriah noh mardor ïa ki briew kiba sah be-aiñ ha Them Ïew Mawlong bad ïaishah ruh haduh 6 snem kynthih hadien ba la khangdam ïa katei ka surok na ka daw jong ka jingïakynad kaba la mih ha katei ka jaka.
“Kum ka seng kam lah ban klet ba ki jingjia shah bom shah tied, ki jingshah lute, ka jingshah leh kynshleiñ bad shah leh khlem akor jong ki samla kynthei bad longkmie Khasi ha kitei ki jaka kiba ju jia na ka por sha ka por namarba kitei ki briew kiba sah be-aiñ ha katei ka jaka ki ïoh leh thik kum ki khun khatduh jong ka Sorkar Jylla naduh ki por mynshwa,” ong u Bah Nongphlang.
“Wat kita ki bor jong aiñ ruh lada don kino-kino ki jingjia ha kitei ki jaka, ki ju ai jingïada pynban ïa kitei ki poiwir kiba shong ba sah be-aiñ katba ïa ki trai-ri trai-muluk kiba dei ki Khasi pat ki kylla long ‘langkñia. Wat hadien ba la khangdam ïa katei ka surok na Them Ïew Mawlong sha Bimola hapdeng kine ki 6 snem ruh la sakhi ïa kiba bun ki kam bymman kynthup ïa ka jingïoh kem ïa ki nongdih bad nongkhaïi drok bad kumta ter-ter,” u la ong.
Haba kynnoh ba ka jingpynmih ïa katei ka hukum ha ka 30 tarik Risaw ka lah ban don eiei sha lyndet, utei u nongïalam u la ong ba kum ka seng kam lah satia ban pdiang ba ha katei ka hukum – ban kdew shai lane ban pyndonkam da ka kyntien ‘Punjabi Lane’ ha ka jaka ban kdew lane thoh ‘Them Ïew Mawlong’.
“Ka Seng ka buh jingkylli ïa ka Sorkar ba hato katei ka jingpynmih ïa katei ka kyntien ka dei pynban ka jingleh khnang ban pynskhem mo ïa ka jinglong trai jong kitei poiwir kiba shong ba sah be-aiñ ha katei ka jaka?,” ong u Vice-President.
Ka seng ha kajuh ka por ka maham jur ïa ka Sorkar Jylla ba ka dei ban shim ïa ka jingkitkhlieh lada mih biang kino-kino ki kynrum-kynram bad kyntu jur (ïa ka Sorkar) ba kam dei satia ban pynsngap ïa ka jingpyrshang ban tuklar bad mushlia da ki briew kiba na kiwei pat ki Jylla ki bym tip satia ïa ka dang ka duh hynrei ban ïaid beit shakhmat ha ka ban pynkynriah ïa kitei ki briew.
“Ka seng hi ka sngew ba ka jingaidaw jong ka Sorkar ban weng ïa ka jingkhapngiah lane kata ka jingdheng kali ka dei tang ka daw ba kim mon satia ban pynkynriah namar lehse ki seng saiñ hima ki shim kabu na ka bynta ka jingmyntoi ha ka kam saiñpyrthei,” u la ong.
Shuh shuh u Bah Nongphlang u la bynrap ba lada ka Sorkar ka don jingthmu shisha halor katei ka bynta, kata ka la dei ban shim ïa ki sienjam ba mar-mar ban pynkynriah mardor ïa ki briew kiba sah be-aiñ ha Them Ïew Mawlong.
Na ka liang ka seng, ka kyntu jur ïa baroh 36 ngut ki MLA ka Bri u Hynñiewtrep ban ïeng tylli mlon tad haduh ba katei ka jingangnud ki paidbah kaba pun da ki phew snem kan urlong bad ban weng shi syndon ïa u shiah uba thar ïa ki paradoh parasnam jong ka Bri u Hynñiewtrep.
