Shillong, Naiwieng 01
U Chief Executive Mem-ber (CEM) ka Khasi Hills Autonomous District Council (KHADC) Bah Pynïaid Syiem u la ong ba don ki briew kiba ïalam bakla ban pynduh noh ïa ki Autonomous District Council (ADC) hynrei kim sngewthuh ba tang ban pynbeit thymmai ïa ka Khyrnit Hynriew (Sixth Schedule) ka shim por da ki phew snem.
Ïa kine ki kyntien u la kren ha jingïalang kaba lyngkot ha Conference Hall ka KHADC shwa ban leit buh syntiew ban kynmaw burom ïa ka lyngkhuh sngi ïap ba 65 snem jong u Bah J.J.M Nichols Roy uba dei u nongsaiñdur ïa ka Khyrnit Hynriew kaba la long mynta ka sngi (Sngi Thohdieng) ha u mot ba la tei ha phyllaw ka KHADC.
Ha kane ka sngi la ïadonlang ki MDC, ki Pastor na ka Balang U Blei (Meghalaya bad Assam) bad ki nongtrei ka KHADC.
U la ong kine ki briew kiba kwah ban pynduh noh ïa ki District Council ki dei kim sngewthuh ïa ka jingtrei shitom u JJM Nichols Roy uba la trei shitom ban pynneh pynsah ïa ka riti dustur ki rit paid kiba don ha Meghalaya. Shuh shuh u la ong ban pynbeit thymmai biang ïa ka Khyrnit Hynriew ka shim por da ki 73 snem naduh ba la saiñdur ïa ka, hynrei sa katno tam ba ka Sorkar India kan sngap lada wanrah thymmai da kiwei ki aiñ ha jaka ka Khyrnit Hynriew.
Na ka liang u Deputy CEM ka KHADC, Bah Pynshngaiñ N Syiem, u la ong ba shisien ba la sloit ïa ka iktiar ka District Council, ka Sorkar India ka la ïoh bor ban tuklar ïa ki bor jong ka jinglong trai ki rit paid hapoh ka jylla. U Bah Pynshngaiñ u la ong ba ha u snem 1972 haba la pynkylla biang ïa ka Khyrnit Hynriew haba la ai bor ha u President ba un peit bniah haba ïatyngkhuh bad ki aiñ ka Sorkar India hynrei lada aibor ha u Lat ka jylla ka kham suk namar u hap hapoh jingpeit ka Sorkar Jylla katba ïa ki aiñ lada phah sha u President ka Ri India kan shem shitom namar u hap ha ka jingpeit ka Sorkar India.
Kane ka jingpynpaw u Bah Pynshngaiñ ka dei namar u Bah Joy u la trei shitom ban thaw ki aiñ lyngba ka khyrnit hynriew ban ïada ïa ka jaidbynriew.
