Shillong, Naiwieng 01
Ha kiwei ki ri, ka aiñ ka pyrkhing bha ïa ki nongshong shnong ban ïoh laisen ñiah kali, hynrei ha India kynthup ruh ha Meghalaya ka long kaba suk ban ïoh laisen khlem da ïaid katkum ki kyndon.
Ki shlem treikam ka tnat Transport kum ki District Transport Office (DTO) ha kylleng ki district ki dei kiba peit ïa ka jingai laisen bad jingpynrung kyrteng ïa ki trai kali bad ki nombar kali.
Ka ju dei ka rukom ba ka jingai laisen ïa kiba ñiah kali la ka dei kiba ñiah kali kamai ne kali shimet hap ban da pynshisha ba ki dei kiba la tip ïa ki kyndon ñiah kali ha shwa ban ai laisen ïano-ïano. Hynrei ka jingdon ki briew kiba ju pynleh ïa ki kot ki sla kali ka pynlong ïa kiba donkam ban ïoh laisen ban ïaid lyngba jong ki. Pynban ki don pat ki nongñiah kali kiba da pynlut por shisha ban shah hikai shwa kumno ban ñiah kali bad hadien kata, ki sa ïaleh ban ïoh ïa ka laisen ñiah kali.
Ka Sorkar Pdeng ka la shimkhia bha ïa ka jingshngaiñ ha ka rukom ñiah kali ha ka ri baroh kawei bad banjur ban don ki jaka hikai ñiah kali (driving training centre) khnang ba ki briew kiba kwah ban nang ñiah kali ki dei ban shah hikai pyntbit bha shwa ha kum kine ki jaka ai jinghikai.
Kumta la bthah ïa ki Jylla bapher-bapher ban buh ïa ki jaka hikai ñiah kali ha kylleng ki jaka ha kaba yn bei lyngba ka skhim jong ka Ministry of Road Transport and Highways (MoRTH).
Na ka liang ka tnat Transportation jong ka Jylla ka la pynmih ïa ka Expression of Interest (EOI) dang shen ha kaba la khot ïa kino-kino ki kynhun ne kompani kiba lah ban buh ïa ki jaka hikai ñiah kali ha man la ki district lyngba ka skhim jong ka MoRTH.
La khot ïa kino-kino ki kynhun ne kompani ban phah ïa ka jingpynkhreh jong ki na ka bynta ban buh ïa ka Driving Training Centre ha man la ki district jong ka Jylla. Kiba kwah ban ïashimbynta ha ka EOI, ki dei ban phah noh ka jingtyrwa ha shwa ka 8 tarik u Naiwieng, 2024.
