Shillong, Naiwieng 01
U samla Steve Jyrwa uba dei u samla na ka Jylla Meghalaya uba da ka jinglah ban ktik bad pynïapbiej ïa ki nongbishar lyngba ka jingshad jong u ha kawei na ki jingïakob shad kaba heh ha ka Ri India ïa kaba la tip kum ka India’s Best Dancer Season-4 bad uba la kylla long ruh ka mat ïakren hapoh ka nongbah Shillong bad ha ka Jylla bad ka Ri hi baroh kawei hadien ba u la shah jied ban rung sha ka ‘Top-6’ jong kane ka jingïakop. Pynban ha kane ka kynti pat, une u samla u la ïoh ban rung beit shaduh ka phainal hadien ba u la lah ban pyni ïa ka sap shad jong u ha kane ka jingïakob shad kaba la pynlong ha Mumbai.
Haba ïakren bad ki nongthoh khubor ha ka Sngi Thohdieng jong ka 1 tarik u Naiwieng 2024, na ka liang ka kmie jong u Steve Jyrwa, ka Kong Bibi Jyrwa ka la pynpaw ïa ka jingsngewnguh ïa U Blei bad ruh ïa u MLA ka Pynthorumkhrah Constituency, Bah A.L Hek, uba la kyrshan borbah ïa une u samla ha ka jingïaid lynti jong u ha kane ka jingïakob shad bad ruh ïa ki paidbah nongkyrshan baroh. Na ka liang ka Kong Bibi Jyrwa ka la pyntip ruh ba mynta ka taïew kan dei ka taïew kaba khatduh ba ki paidbah kin lah ban kyrshan ïa u Steve da kaba vote ïa u namar ba don ar tylli ki ‘App’ kata ka Sony Liv bad ka ‘Lenskart’, ki paidbah ki lah ban vote tang 500 tylli na kawei-kwei ka ‘App’ kaba mut ba na ki artylli ki ‘App’, ki lah ban vote ïa u Steve haduh 1000 tylli ki vote na uwei u briew bad ka jingïakop jong ka phainal kan long ha ka 10 bad 11 tarik u Naiwieng 2024. Na ka liang u President ka All Meghalaya Dancers Association (AMDA), Bah Kitbok Thabah u la kyntu ïa ki paidbah ba kin ai ka jingkyrshan ïa u Steve Jyrwa namar kumba la tip ba une u samla napoh ka Jylla un hap ban aireng bad kiwei pat ki samla kiba tbit na kiwei pat ki Jylla ha kane ka jingïakob. Ha kajuh ka por, na ka liang u President ka AMDA, u la ai khublei ruh ïa u Myntri Rangbah ka Jylla, u Conrad K. Sangma, u Myntri ka tnad Arts & Culture, u Bah Paul Lyngdoh, u Symbud Myntri Rangbah ka Jylla, u Bah Sniawbhalang Dhar lem bad kiwei-kiwei ki Myntri ka Sorkar Jylla kiba la kner ïa ki lad jingïarap. U la buh ruh ka jingkyrpad ïa ka Sorkar Jylla ba kan ai ka jingkyrshan ruh ïa ka seng AMDA kaba don ïa ka jingthmu ban sei ïa ki samla donsap ban mihkhmat ïa ka Jylla ha ka liang ka shad ha ki rynsan kiba long hapoh ka Ri bad shabar jong ka Ri ruh kumjuh.
“Nga kyrmen ba kine ki baroh kin dang ïai ai jingkyrshan shuh-shuh ïa ka kynhun jong ngi khnang ba ngin dang ïai khlaiñ shuh-shuh bad ban dang ïai trei na ka bynta ki khun samla ka Jylla Meghalaya baroh kawei”, ong u Bah Thabah.
