Nongstoiñ, Naiwieng 01
U Babu Wanpyndap -Hi Laloo, General Secretary ka All Meghalaya SSA School Teachers’ Association (AMSSASTA-CB) u la ong ba kane ka dei ka khubor kaba ki kwah ban ai sha baroh ki para nonghikai SSA ba ka hamsaïa jong u 2026, ka seng kan ym lah ban pdiang katba ka Sorkar Pdeng kam pat ai ïa kano-kano ka jingpynbna kaba tikna (official) ba kan pynsangeh noh ïa kata ka jingai jingïarap ïa ka Sorkar Jylla ha u snem 2026.
Ïa kane la kren bad pynpaw da u Babu Wanpyndap-Hi haba kren ha u nongthoh khubor hadien ba la kut ka jingïalang lane ka General Meeting jong ki nonghikai SSA kiba hap ha u pud u sam jong ka West Khasi Hills ïa kaba la pynlong da ka All Meghalaya SSA School Teachers’ Association (AMSSASTA-CB) ha ka Sngi Thohdieng ha Lowingwel Secondary School, New Nongstoiñ.
U Babu Wanpyndap-Hi u la ong ba ka seng ka la kren shai ba ka jingailad jong ka Sorkar ban aplai sha ki kam Sorkar ruh ka khlem pat kren shai la ka long ba ka don ne em ka jingbuh kyrpang ïa ki nonghikai SSA.
U la ong ruh ba ki la ïohi ba ka jingkren jong u Myntri ka tnad pule puthi ka long ban ïakhun bad ïaleh beit bad ki bathymmai bad ha kaba ïadei bad kane, ka seng kan sa nang leit ïakynduh ïa u Myntri ba dei peit ban pynshai la ka don ne em ka bhah kyrpang, hynrei kumba long mynta ka jingpynbna ka long beit tang ban ïakhun thymmai beit bad kiwei pat.
U la bynrap, “Ha kaba ïadei bad ka jingtieng jong ki nonghikai SSA baroh kawei ka Jylla kaba ki don ki hamsaïa bad ki don kiba pyntieng ïa ki para nonghikai ba ka SSA kan kut noh ha u 2026, kane da kaba shai ngi kren sha ki para nonghikai, ba na ka liang ka Sorkar ha kaba ïakynduh bad ka seng ka la kren da kaba shai ba kane ka SSA kan ym kut bad ban pynskhem shuh-shuh – ïa kata na ka liang ka Myntri Sorkar Jylla, Dr.Ampareen Lyngdoh ka la ïathuh ba hadien ka jingmih ki hamsaïa, ka la kylli ïa u Vice-President ka Ri ha ka jingwan ïuh kjat ka jong u hapoh ka Jylla bad ka la kren shai ba ka lah ban kut ka ‘plan’ hynrei ym ban pynkut ïa ka ‘project’.”
U la ong ruh ba kane ka projek kumba la ïathuh na ka liang ka Sorkar kan ïaid bteng bad ka dei ka kamram ruh jong ka Sorkar ba kan shimti lada jia ba ka Sorkar Pdeng ka pynduna noh ïa ka jingai jingïarap.
U Babu Peter Thyrniang, President ka All Meghalaya SSA School Teachers Association pat u la ong ba ka seng ka pynlong ïa kine ki jingïalang bapher-bapher bad yn hap leit pynlong ïa kane ka jingïalang ban pynshai sha ki para nonghikai ha man la ka distrik kaba sdang mynta ka sngi napoh West Khasi Hills.
U la ong ba kine ki dei ki prokram ban sa ïaid nangne shakhmat khamtam eh ban pynshai halor ka jingklumar jingmut jong ki nonghikai ha kaba ïadei bad ka jingpynjlan snem thep kam ïa kaba la pynbna da ka Sorkar bad kumjuh ha kaba ïadei bad ka hamsaïa bad pyntieng kohtympan ba ka Project SSA kan kut noh ha u snem 2026.
“Ngi ïakren ha kaba ïadei bad kane ka jingpynjlan snem thep kam, ki nonghikai kim dei ban don kano-kano ka jingsngew lynga sngew pisa namar kane kam dei na ka bynta ban leh, kaei-kaei kyrpang na ka bynta ki nonghikai, hynrei ka dei tang ban ailad ïa ki nonghikai SSA kiba don ha la ki jong ki skul bad kin ïoh ban ïashim bynta sha kano-kano ka kam ka bathymmai kaba ka Sorkar ka pynmih na ka bynta jong ki nonghikai kiba don ïa ki syrnod MTET la ki dei ki nonghikai lane na ka bynta ki bathymmai.” ong u Babu Peter.
Shuh shuh u la ong ba kane ka jingpynbna na ka liang u Myntri ka tnad pule-puthi ka Sorkar Jylla haba ïadei bad ka 6 spah ‘post’, kane ruh ka dei ka ei na ki lad ki lynti ba kito kiba don ïa ki syrnod la kiba la long ‘qualified’ ban ïakhun ïa kine ki 6 spah tylli ki ‘post’, hynrei kane kam don jingïadei eiei bad ka jingpynlong ryntih (regularisation) lane ban pynkynriah noh ïa ki nonghikai sha ka tnad pule-puthi, hynrei ka dei tang ka jingpynduna lada ki lah ban ïakhun bad ki khynnah kiba dang thymmai, ki khynnah ki ba dang don hapdeng ka jingïaleh lane ka jingpyndep ïa ki jingpule bapher-bapher ki jong ki.
