Shillong, Naiwieng 01
U MLA jong ka Pynthorumkhrah Constituency, Bah A.L Hek bad uba long ruh u Myntri ka Sorkar Jylla, kum shibynta ka jingai jingkyrshan ïa u samla Steve Jyrwa uba long uwei na ki samla Khasi na ka Jylla halor ka jinglah jong u ban poi shaduh ka rynsan jong ka phainal ha ka jingïakop shad jong ka India’s Best Dancer Season-4, ha ka 1 tarik u Naiwieng 2024, u la buh ka jingkyrpad bad ka jingkyntu ïa baroh ki nongshong-shnong jong ka Jylla Meghalaya lada ki long ki Khasi, Jaiñtia ne Garo ne wat kiwei-kiwei ki Jaidbynriew ruh ba kin ai ka jingkyrshan kaba radbah ïa u Steve Jyrwa khnang ba kan long ka burom kaba khraw ïa une u samla, ïa ka iing-ka sem jong u bad ruh ïa ka Jylla hi baroh kawei.
U Bah Hek u la ong haba bishar ïa ka jingdon jong ki paidbah kiba kyrshan ïa u Steve Jyrwa, lah ban ïohi ba wat na kiwei-kiwei ki Jylla ha ka Ri ruh ki la ai ïa ka jingkyrshan bad ong ba kan eh aiu ïa ki nongshong-shnong jong ka Jylla Meghalaya ban ai ïa ka jingkyrshan na ka bynta une u samla ka Jylla.
U la ong ruh ba kum ki nong Meghalaya ki dei ban ai bha ka jingkyrshan ïa u Steve namar lada ka jingkyrshan kam don na la iing, kumno yn ap sa ïa ki jingkyrshan jong ki briew kiba nabar ka Jylla.
“Kan ieh aiu ïa ngi kum ki nongshong- shnong ba ngin ai ka jingkyrshan bad ngi lei ngi dei ban ai jingkyrshan kaba nyngkong eh nala ïing lajong namar lada ngi na la ïing ngim ai ka jingkyrshan, kumno phin ap tang ka jingkyrshan na ki briew kiba nabar?,” ong u Bah Hek.
Shuh-shuh u Bah Hek u la pynkynmaw ruh ba ha u snem 2008 ha ka por ba u Amit Paul u la poi sha ka phainal jong ka jingïakop rwai ka Indian Idol, la ïohi ba katno ki paidbah napoh ka jylla Meghalaya ki la ïa mih na la ki ïing-ki sem ban ai jingkyrshan ïa u Amit Paul da kaba vote lyngba ki ‘phone call’ bad ha kajuh ka rukom ruh, na ka liang u Myntri Sorkar u la kyntu bad kyrpad jur ïa ki paidbah ba kin ai ïa kajuh ka jingkyrshan na ka bynta u Steve Jyrwa u ba long u khynnah samla Khasi u ba nyngkong eh ban poi shaduh ka phainal ha ka jingïakob shad.
“Ha kane ka por, kumjuh kumba ngi la ai ka jingkyrshan ïa u Amit Paul, nga kyrpad ïa ki paidbah baroh ba ngin ai kajuh ka jingkyrshan ïa u Steve Jyrwa u ba dei u khun samla na kane ka Ri jong ngi”, bynrap u Bah Hek.
