Shillong, Naiwieng 01
U CEM ka KHADC bad MDC ka NPP Sohryngkham konstitwensi, Bah Pynïaid Sing Syiem, u la pyntip ba un sa rung dkhot pura ha ka seng NPP ha Nongthymmai konstitwensi mynta u bnai Naiwieng.
Haba ïakren bad u Bah Pynïaid ha phyllaw ka KHADC shwa ban kiew ha kali hadien ba la dep buh syntiew ïa ka jingkynmaw burom ïa ka sngi khlad u Bah J.J.M Nichols Roy, u la ïathuh ba hadien ba u la iehnoh ban ïakhun na Sohryngkham konstitwensi um don jingtip shuh ïano kin pynïeng bujli namar ïalade u la rai ban ïakhun ïa ka ilekshon MDC na Nongthymmai konstitwensi.
U la ïathuh ba mynta ka NPP Nongthymmai konstitwensi ka dang pynkhreh ban pdiang ïa u ban long dkhot ba pura ka lah ban dei mynta u bnai Naiwieng ne kin ap haduh ban da kut eksam kaba dei haduh ka taïew ba nyngkong u Nohprah mynta u snem.
Haba kylli, ïano phin pynïeng bujli ha Sohryngkham konstitwensi, u Bah Pynïaid u la ong ba ka shong ha ka Mawryngkneng Block ba kan rai ïano ba kan ai tiket hynrei haduh mynta ki dang shong bishar.
Haba kylli biang, balei phi iehnoh ïa ka Sohryngkham konstitwensi ha kane ka ilekshon MDC, na ka liang u Bah Pynïaid um treh shuh ban jubab namar u la dep batai kham mynshwa.
Kum ban shu pynkynmaw, u Bah Pynïaid u la dep ïathuh ba ka jingpynkhreh jong u ban ïakhun na Nongthymmai konstitwensi ka dei ka jingwan tyrwa ki ‘riew rangbah, ki longkmie bad ki samla. Kane ka la urlong hadien ba u la iehnoh ïa ka kam kum u President ka NPP Mawryngkneng Block ha kine ki khyndiat bnai.
U Bah Pynïaid u la dei u MDC ba la jop arsien na Sohryngkham konstitwensi bad jop shisien kum u MLA ha ka ilekshon shiteng samoi na Mawryngkneng konstitwensi.
Ki tyllong khubor ki ïathuh ba ka jingmih noh u Bah Pynïaid na Sohryngkham konstitwensi ka dei namar u sngewthuh ba um lah ban ïakhun ïa ka ilekshon MDC ka ban wan namar ka jingshah rem ha ka ilekshon MLA ha u snem 2023 ha kaba ki paidbah ki la pynjop ïa u kyrtong ka VPP, Bah Heavingstone Kharpran.
