Shillong, Naiwieng 01
U President ka Hynñiewtrep Achik National Movement (HANM), Bah Lamphrang Kharbani, u la ïathuh ba ki dkhot jong ka seng kin ïa noh synñiang pisa na man ki shnat ban leit ïakhih biang sha Delhi kaba la ïoh jingbit ban long ha 25 tarik Rymphang 2025 ha Jantar Mantar Delhi.
Haba ïakren bad ki lad pathai khubor ha Shillong Press Club, u Bah Lamphrang u la ïathuh ba kane ka jingleit ïakhih sha Delhi ban dawa ban ithuh noh ïa ka ktien Khasi bad Garo ha khyrnit baphra, ka Inner Line Permit bad ban pynbeit noh ïa u pud u sam bad ka jylla Assam.
U la pyntip ba ka bun ka jinglut lada leit jingïakhih sha Delhi hynrei lada synñiang pisa para dkhot kam don jingeh lada leit shaduh Israel ruh.
U la pynkynmaw ba ka seng ka la leit ban ïakhih shaduh Delhi ban dawa ïa kitei ki mat ba ki paidbah ka jylla ki la angnud ha kaba ki 60 ngut ki MLA ki la dep shim ïa ka rai ha ka ïingdorbar thawaiñ.
U la ong ba ka seng ka kwah ba ki paidbah kin kyrshan ïa kane ka jingïakhih sha Delhi khnang ba ka Sorkar India kan sngap haba ki paidbah ki mih madan.
“Ngi la dep ïakynduh ïa u MP Rajya Sabha u Rakesh Sinha uba dei na ka seng BJP uba peit ïa ka thaiñ North East India uba la kular ban ïakren ïa kine ki mat jingdawa ha ka Parliamentary Standing Committee” u la ong.
U la ïathuh ba une u MP u la ong ba ïa kaei kaba ka Standing Committee ka la mynjur ha ïingdorbar thawaiñ la shu wanrah bad satang ban shu mynjur.
