Jowai, Naiwieng 01
Ka lyer ilekshon sha ka ïingdorbar thawaiñ jong ka Jaiñtia Hills Autono-mous District Council (JHADC) ka la sdang beh ha Rilum Jaiñtia wat la ym pat thikna ba ka ilekshon kan long lano hadien ba la dep pynjlan haduh 12 bnai ïa ka samoi treikam jong ki MDC kiba mynta.
Kumba ju long ha ki ilekshon ba la dep, ki Dorbar Shnong bapher-bapher ki ju wan sha-khmat ban pynpaw paidbah ïa la ka jingkyrshan ïa la ki kyrtong.
Mynta ka kynti ka Dorbar Shnong Moodym-mai ka long ka Dorbar Shnong kaba nyngkong eh ban pynpaw ïa ka jingkyrshan jong ka ïa u MDC ba mynta u Bah Jesse Suiam u ban ïakhun biang ïa ka ilekshon MDC.
Ka Dorbar Shnong Moodymmai ka la pynlong ïa ka jingïalang paidbah jong ki nongshong shnong kaba ki la jer kyrteng kum ka Dorbar Ilekshon ha ka Community Hall jong ka shnong ha ka Sngi Balang mynta ka taïew.
U Chairman ka Dorbar Shnong Moodymmai Bah Emris Ksoo, u la ong ba u MDC ba mynta u la kyrpad ban ai jingkyrshan ïa u ha kane ka MDC ilekshon ban wan, kumta ka dorbar shnong ruh ha ka jingïalang ka la shim ïa ka rai ban kyrshan pura ïa u Bah Jesse Suiam kum u kyrtong MDC na ka shnong Moodymmai.
“Ka long kaba sngewkmen sngewtynnad ban ïoh lum ïa ka dorbar ilekshon ban pynkhreh ïa ka ilekshon MDC ka ban wan. Kum u MDC u la wanrah shibun ki skhim bad ïarap ïa ka shnong ka thaw bad ki dong ki shnat bad kum ka dorbar da kawei ka sur ngi la kut jingmut ban kyrshan pura biang ïa u ha kane ka kynti,” ong u Bah Emris Ksoo.
U la kyntu ruh ïa ki kiwei ki shnong kiba don hapoh ka Moodymmai-Nongkhroh Konstitwensi (kaba tip mynshuwa ka Moodymmai-Ummulong) ban ai ka jingkyrshan lang ïa une u MDC.
“Haduh u snem 2028 kan ym don da kawei pat ka Sorkar lait na ka MDA kaba ïalam da ka NPP, ban bat ïa u lakam synshar bad dei tang ha kane ka Sorkar ngi shaniah ban ai ïa ka jingkyrkhu ïa ka imlang ka sahlang bad Rilum Jaiñtia baroh kawei,” u la ong bad bynrap “To kyrshan lang ïa ka Sorkar NPP ba kan synshar ïa ngi haduh 2028 ba kan ai ka jingkyrkhu kumba ngi thrang angnud.”
