Shillong, Naiwieng 03
U MDC ka Congress na Mawkhar-Pynthorum-khrah, u Bah Pynshngaiñ N Syiem u la pynpaw ka jingartatien ba ka Sorkar India kan wanrah ïa ka jingpynkylla ha ka Khyrnit kaba Hynriew jong ka Riti Synshar.
“Kumba ka paw mynta I kumba ka Sorkar India kam pat da kyrkieh ban wanrah ïa ka jingpynkylla ha ka Khyrnit kaba Hynriew”, u la ong.
U la ong ruh ba ym lah ban tip pat ïa ka jingmut jong ka Sorkar NDA ha Delhi, kaba lah ban leh syndet ha kano-kano ka por kumba la jia ha ka por ba ka wanrah ïa ka Women’s Reservation Bill ha Parliament.
“Ïa ka jingpynkylla hapoh ka Khyrnit kaba Hynriew ruh ngim nang ban batai, ïoh leh-se ki wanrah ha une u Nohprah bad ki pynmih kyrkieh ïa ki jingpynbna”, la ong u Nongïalam ka Congress.
U Bah P.N Syiem uba dei ruh u Deputy Chief Executive Member ha KHADC u la pynpaw ba ka jingpynjlan biang ïa ka ilekshon leh-se kan nym don shuh wat lada ka Sorkar India ka rah ïa ka amendment ha Parliament, hynrei ka shong ha ka rai ba khatduh pat jong ka Sorkar.
U la ong ba la kumno-kumno ka ilekshon ka la dei ban long ha u Rymphang jong u snem ban wan lada ka Sorkar India kam kyrkieh ban wanrah ïa ka amendment hapoh ka Sixth Schedule.
“Lada ka Sorkar India ka wanrah ïa ka amendment bill, ka shong ha ka kumno ka pynmih ïa ka jingpynbna, la kan phah ban pynlong beit ïa ka ilekshon katkum ki konstitwensi kiba rim, ne kan ailad haduh ban pynbeit thymmai da kumwei ïa ki konstitwensi”, la ong u Bah P.N Syiem.
Lah ban kdew ba ki 10 tylli ki District Council jong ka thaiñ Shatei Lam Mihngi ka ri India, ki la dawa ba na ka Sorkar India ban wanrah noh ka jingpynkylla kaba 125 hapoh ka Khynit kaba hynriew. Na ka bynta kane, ka kynhun jong ki 10 tylli ki District Council ki la leit buddien ruh sha Delhi ban ïakren bad u Myntri Kam Pohïing, u Amit Shah ban wanrah ïa ka jingpynkylla hapoh Parliament ha ka dorbar tlang ka ban long ha u Nohprah.
Ki District Council kiba don hapoh kane ka thaiñ ki kynthup ïa lai tylli na ka Jylla Meghalaya, ka Khasi Hills Autonomous District Council, Jaintia Hills Autonomous District Council bad Garo Hills Autonomous District Council, kiwei pat ki long ka Bodoland Territorial Council, Tripra Tribal Area Autonomous District Council, North Cachar Hills Autonomous Council, Karbi Anglong Autonomous Council, Chakma Autonomous District Council, Mara District Council bad ka Lai District Council.
