Nongstoiñ, Naiwieng 03
Ka mat jong ka jingkynrei u drok uba la sdang lehse mynta ban rung ym tang ha ki jaka sor hynrei wat haduh ki thaiñ nongkyndong, ka la dei kawei na ki mat kaba don ïa ka jingsngewkhia ïa ki babun balang khamtam ha ka imlang ka sahlang ha kine ki sngi. Kumta ka la pynlong ïa kiba bun ki kynhun khamtam na ka tnat pulit, ki shnong ki thaw, ki kynhun seng ban mih shakhmat ban ïakhun tyngeh ban rat dyngkhong ïa ka jingkynrei jong u drok.
Halor kane ka bynta, haba phai sha West Khasi Hills District khamtam hapoh sor Nongstoiñ ha ki snem ba la leit noh la ong ba ki la don ruh ki kynhun nongkhaïi drok kiba la byrngem bad thmu ruh wat ban pynlong ïa ka sor Nongstoiñ kum kawei na ki jaka khaïi drok ba pawnam ïa kaba ma ki, ki thmu pynïanujor bad kiwei ki jaka ha ki Ri jong ka pyrthei.
U samla Mawkordor Kharsyiemlieh, President ka Village Defence Primary Committee Nongstoiñ Area (VDPCNA) ha ka jingdonlang ruh u Naik Secretary Bah Shailambok Marbaniang haba kren halor kane ka phang ha u nongthoh khubor, u la ong ba ka jingthaw ïa ka VDPCNA ka long ha u 2019 bad ha kito ki snem ka don kawei ka kynhun jong ki nongkhaïi drok hapoh West Khasi Hills, ki pyni sha u paidbah lyngba ki kam ki jong ki ban ong ruh ba ïa ka West Khasi Hills yn pynlong kum ka ‘Mexico’ bad kane ka la pynsuhjer bad sngewkhia bad sngewtieng ïa kata ka jingïohsngew ka sur kaba mih na kata ka kynhun ki nongkhaïi drok.
Shuh shuh u la ïathuh ba halor kane, ki VDP ki la ïa shong ban pyrkhat kum ki VDP hapoh Nongstoiñ kumba saw bad san tylli ki shnong ban ïa pyrkhat ba kumno yn leh ïa kane ka kam. Hadien ba la ïa pyrshang ban ïa wad ïa ka kyrteng ban thaw lane thaw ïa ka kynhun ïa kaba la ïoh ban ai kyrteng ka Village Defence Primary Committee Nongstoiñ Area bad ha kaba sdang eh la ïoh ban thaw nyngkong ha ki 16 tylli ki shnong bad hadien pat ki wan ban pynïasoh haduh 36 tylli ki shnong.
U la ïathuh ruh ba hadien ba la thaw ïa ka VDP, la pynlong ka jingkhynra ïa ki ïew bad bun ki jaka haduh ba la lah ban ïakhun ban pynpra ïa ka ktem drok ha u 2019 namar la sngew tieng shisha ïa kata ka jingbyrngem ban pynlong ïa ka Nongstoiñ kum ka ‘Mexico’.
U la ong ruh ba ka jingsngewkhia bad ka jingtieng ka dei na ka bynta ki khun samla kiba dang sdang ban khie samla bad ha ka jingtrei shitom la lah shisha ban pynpra ïa kata ka ktem ka jong ki. Kat haduh mynta na ka liang ka VDPCNA kan nang pynkhlaiñ shuh shuh bad kawei ruh ka long ba ki paidbah nongshong shnong, ki shnong ki ai ka jingkyrshan haba trei ïa kane ka kam khamtam ha ki jingleit khynra ha ki por mynmiet kaba dei ha ki bynta jong ka sor Nongstoiñ.
U Bah Mawkordor u la ong ruh ba ka jingthaw ïa ka VDPCNA ka don ïa ka daw bah ha kaba ki Sordar Shnong, ki Myntri, ki Seng Samla, ki Sports Club bad ki ‘riew rangbah ki kyrshan bad ai ka bor ban thaw.
Halor ka jingong jong katto-katne ki kynhun ba na ka liang ka tnat pulit ka WKH kam shym la leh eiei halor ka jingkynrei jong u drok khamtam ha ïew Nongstoiñ, ka VDPCNA ka pynpaw bad kyntu ba ïa kino-kino ba kim dei ban shu kren khlem da tip ïa ka jingshisha ha kaba ka la ïathuh ba haduh mynta ki pulit lem bad ka jingïatreilang bad ka VDPCNA man ka por ki pynlong ïa ka jingkhynra khamtam hapoh ka ïew Nongstoiñ.
Namar kata, ka VDPCNA lyngba u Bah Mawkordor kum u nongïalam ka kyntu ïa ki nongshong shnong, ki khun samla, longkmie-longkpa, ïa kiba shong dukan khamtam ïa ki ba ïaid ba ïeng ha ki shnong jong ka Nongstoiñ Town Area, nyngkong eh ka long ban ïa peitngor lem bad lada don kano-kano ka jingeh pyntip sha ka VDPCNA, ka long kaba kloi ban ïarap bad ha kajuh ka por ka long ruh ka jingmaham lada ka VDPCNA kan lap ïa kino-kino kiba leh kam sniew, kan kem bad aiti sha ki bor jong ka aiñ bad ka VDPCNA ka la shim ïa ka rai ba nangne shakhmat kan nang ïai pynkhlaiñ ban peitngor ïa ki kam sniew.
