Mawkyrwat, Naiwieng 03
Ki shipai Border Security Force (BSF) ryngkat ki pulit jong ka thanat Ranikor ha ka Sngi Saitjaiñ ka 2 tarik u Naiwieng, 2024 ha ka por kumba 11 baje eiei mynmiet ki la ïoh ban kurup ïa ki pisa thok na ïing jong kawei ka longkmie kaba tip kyrteng kum ka Teng D Sangma, 42 snem ka rta na ka shnong Tilagoan kaba hap hapoh ka Rajai BOP ha South West Khasi Hills District. Katkum ki tyllong khubor na ki pulit la ïathuh ba ki pulit bad ki BSF hadien ba ki la ïoh ïa ka jingtip ba thikna lyngba ka Joint Search Operation, ki la leit ban khynra ïa ka ïing jong ka Teng D Sangma ha kaba ki la ïoh ban kurup kumba T.70 hajar ka pisa thok.
Shuh shuh ki tyllong khubor na ki pulit la ïathuh ruh ba ha ka jingtohkit, katei ka longkmie ka la ïathuh ba ïa katei ka pisa ka ïoh ha ka por ba ka ïa khaiï-pateng bad kam dei ba ka thmu ban shalan tuh ïa katei ka pisa.
Ha kaba ïadei bad katei ka jingjia, ki pulit ka Ranikor ki la kem noh ïa katei ka longkmie bad ki la pynrung ruh ïa ka mukotduma bad ka jingtohkit haduh mynta ka dang ïaid shakhmat.
