Nokmakundi, Naiwieng 03
Namar ka jingbynñiaw halor ka jingïai bteng ka jingtih shyiap be-aiñ kaba la buh jingma ïa ka jingim bad ka kam ka jam jong ki paidbah, ki kynhun seng bapher-bapher jong ka Assam bad Meghalaya ha ka Sngi Saitjaiñ ki la pynlong ïa ka jingïalang, bud sa ka jingïaid paidbah ban pynpaw ïa ka jingbitar halor ka jingbym leh eiei ka Sorkar haba ïadei bad ki jingujor jong ki.
Ïa ka jingïalang la ïalam da ka Mothers’ Union jong ka khappud Assam bad Meghalaya bad la dawa ban pynsangeh noh ïa ka jingeh kaba la pynthut shi kat dei ïa ka jingim jong ki. Ïa ka jingïalang la pynlong ha Madan ïalehkai ka shnong Nokmakundi (ha shilynter ka khappud Assam-Meghalaya).
Ha kane ka prokram la wan ïashim bynta da ki nongïalam ka Garo Students Union (GSU) Assam State Zone, Garo Women Council (GWC), All Bodo Student Union (ABSU), Garo Gaonburha Association lem bad kiwei-kiwei ki kynhun seng na Assam bad Meghalaya.
Haba kren ha ka jingïalang, u nongai buit ka ABSU, u Dhiraj Hazowary u la ong, “Tylli ngin ïeng, saphret ngin khyllem” bad kyntu ïa baroh ki jaidbynriew ‘riewlum jong ka thaiñ ban ïeng pyrshah ïa ka jingtih shyiap be-aiñ na ka Wah Dudhnoi (Manda) bad ïa ki jingktah ki ban wan ryngkat hadien-habud.
“Ha ki sngi ban wan, yn ym don shyiap shuh na bynta jong ngi ban pyndonkam. Kane ka wah ba thylli kan ktah ïa ki jingthaw ba im ha um, ki pyntha kba, ka jingtuid khyndew bad kiwei kiwei ki jingeh. Da ki spah tylli ki trok ba kit palat pud khlem ‘challan’ ki ïaid be-aiñ sha nongbah Guwahati man ka sngi bad ki surok kiba ailad ïa kane, ki nang julor kat nang mih ki sngi,” ong u Dhiraj.
“Ha ka jaka ban pynsangeh ïa ka jingtih bad jingshalan shyiap beaiñ, ka tnad khlaw ka bunkam ban lum pisa na man ki trok ban pynhun ïa ki kyrdan ba halor. Ka tnad khlaw ka la buh ïa ki ophis ha Rangjuli, Dudhnoi, Dhupdhara harud surok hynrei kane kam shym la sangeh. Kane ka pyni aïu ïa kaei kaba jia?,” u la buh jingkylli.
U President ka GSU – Assam State Zone, u Folding R. Marak u la ong ba lada ki briew jong ka thaiñ ki pyrshah jur ïa ka jingtih shyiap, kumta ka Sorkar kan hap ban sangeh noh. Ïa kaba kum kane, u la ong, la jia ruh ha Wah Boko. Hynrei namar ka jingpyrshah jur jong ki paidbah, ka Sorkar ka la pynsangeh noh ïa ka jingtih na Wah Boko ha ka thaiñ jong ka shnong Kompaduli.
U President ka GWC u la kyntu ruh ïa baroh ban ïeng tylli lang kawei ban pyrshah ïa ka jingtih shyiap la ka long katkum ka aiñ ne kaba be-aiñ.
“Ka Nokmakundi bad ki shnong ba marjan ki mad ïa ka jingtuid khyndew, ka jingbym don um ban rep wat ha ki por slap haba ka wah ka dap bad shlei um,” ong u President ka GWC.
Ka President ka Mothers’ Union, ka Sona Marak ka la ban jur ba la pynlong ïa ka jingïalang namar ka jingujor jong ki paidbah halor ka jingtih shyiap be-aiñ ha Nokmakundi bad Kalikapara lem bad ki shnong ba marjan hapoh ka 72 No. Damra Gaon Panchayat (G.P) jong ka Dudhnoi Revenue Circle.
“Ka jingujor paidbah ba nyngkong eh haba ïadei bad ka jingtih shyiap be-aiñ ha Nokmakundi bad Kalikapara ha ka 14 tarik u Lber, 2023 la pyntip sha ki bor ba dei khmih bad la sdang ruh ban leh ïa kaba donkam pyrshah ïa ki nongtih be-aiñ. Ki la kurup ruh ïa ki tiar jong ki kiba la pyndonkam ha ka ban tih na katei ka jaka tih shyiap. Hynrei hadien shisnem, kine kijuh ki briew ki la leh biang ha ka 16 tarik u Naitung, 2024. La aiti ruh ïa ka jingujor paidbah da ki Gaonbura jong ki shnong ba marjan halor ki jaka tih shyiap be-aiñ. Hadien ka jingtohkit, la pynsangeh noh ïa ka jingtih na bynta 3 bnai, katba ha Kalikapara, ka la bteng haduh kine ki sngi,” ka la ong.
“Khatduh eh, ka jingtih shyiap be-aiñ ka la jia biang ha Nokmakundi naduh ka taïew banyngkong jong u bnai Risaw, 2024 haduh mynta. Hynrei ka jingkhlong shyiap be-aiñ ha Wah Dudhnoi (Manda) ka ktah jur ïa ka mariang kaba ïalam pat sha ka jingtuid ka khyndew, ka jingjaboh ha ka um – na bynta ki briew jong ka thaiñ baroh kawei” la bynrap ka Sona Marak.
Katkum ki tyllong khubor, ki shnong kiba shah ktah ki long ka Nokmakundi, Kasumari, Wanglapara, Kalikapara, Damra, Damra Patpara, Tengasot, Bakrakhuti ha ka thaiñ Assam. Ha kawei pat ka liang, ha Meghalaya ki shnong ba shah ktah ki kynthup ïa ka bynta jong ka Nogolpara, Kentra, Nameram bad Ansalipara.
Shuh shuh ka President ka Mothers’ Union, ka Sona Marak ka la ong ba kin sa leit ïakynduhlang ïa u Myntri Rangbah ka Assam bad ki Myntri ba dei khmih ban phah pynsangeh noh shi syndon ïa katei ka jingtih shyiap.
“Lada kam long kam, ngin ïai bteng ban ïakhih ban pynsangeh ïa ka jingtih shyiap,” ka la ong.
