Shillong, Naiwieng 03
Hadien san snem ba ka ïingmane Balang U Blei Qualapatty, Shillong ka la ingkhong na ka jingkem ding namar ka jingthut ha ki waiar ilektrik, ka Balang U Blei Meghalaya and Assam kan pynkhreh shaid-shaid ban pyndep bad ban ïoh aiti noh ïa kane ka ïingmane la shem snem sha ka Balang Qualaptty kaba dei ka nongpeit nongsumar naduh mynshwa.
Haba ïoh ban ïakren bad u Rev. Dr. Amos C Moore uba bat kum u Chairperson Church Building Committee Qualapatty, uba long ruh kum u President Business Associates Balang U Blei, President Nichol Roy Bible College Sohryngkham, President JJM Nichol Roy College Qualapatty u la ïathuh ba katkum ka jingpynkhreh ban pyndep noh ïa ka jingtei ïa ka ïingmane khnang ban ïoh aiti noh ha u bnai Naiwieng 2025 ha ka Balang Qualapatty.
U la pynkynmaw ba kane ka ïingmane ka la ingkhong ka dei ha u bnai Naiwieng 2019 kaba dei ka ïingmane kaba la dap da ki spah snem kaba la tei ha ka por u Rev. JJM Nichol Roy kaba dei ruh ka ïingmane ba la tei ha ka por ba dang synshar ki phareng.
Nalor kane, u la pynkynmaw ba ka jingpluh katei ka ïingmane ka dei ka jingthut ha ka bording namar ba ka dei ha ka por mynstep ym don ba ïohi ne ïohsngew namar ka dei ka por ba dang ïohthiah.
U Pastor u la ïathuh ba ha ka por ba shna ïa kane ka ïingmane ha Qualapatty, ki la wan ban kyrshan na kylleng ki jaka ban tih nongrim katba ban sumar bad ban maramot la leh da ka Balang Qualapatty.
U la pyntip ruh ba kiba wan jingïaseng ha ïingmane ha Qualapatty kiba bun ki dei kiba sah ha Mawprem, Mawkhar, Riatsamthiah, Jaïaw, Lamavilla, Lumdiengjri, Wahingdoh. Shuh shuh u Pastor u la ïathuh ba ha Qualapatty ka Balang U Blei (Meghalaya and Assam) ka buh ruh ïa ki jaka treikam bapher bapher kaba don ha syndah jong kane ka ïingmane. “Ha ka por ba ka ïingmane ka la pluh, ngi la pynlong jingïaseng ha ophis treikam ka Assembly kaba ngi la buh ruh da ki CCTV,” u la ong.
U la ïathuh ruh ba ha u bnai Nailur 2023 la dep shna ïa ka mala kaba nyngkong kaba la ïoh ban pynlong jingïaseng bad ha u bnai Naiwieng 2025 kin pyndep noh ban ïoh ban pynlong jingïaseng sa ha ka mala ba shajrong.
U la pyntip ruh ba ka Balang U Blei (Meghalaya & Assam) ka la mang pisa ban pynlut haduh 10 klur tyngka ban pyndep tei ïa ka ïingmane ha Qualapatty.
