Shillong, Naiwieng 03
Ka Khasi Jaiñtia Got Talent Season-1 kaba la pynïaid da ka Khasi Indigenous Foundation, ha ka Sngi Saitjaiñ jong ka taïew ka 2 tarik u Naiwieng 2024 ka la pyllait paidbah ïa ka ‘trophy’ na ka bynta ki nongjop ha ka phainal ka ban sa long ha ka 11 tarik u Nohprah 2024 ha Madanthad jong ka shnong Mukhla, West Jaiñtia Hills District.
Haba kren bad ki nongthoh khubor ha ka Sngi Saitjaiñ, u Director jong ka Foundation, u Bah Niman N Shadap u la pyntip ba ha kane ka jingïakob ki la don haduh 30 ngut ki nongïashimbynta ha kaba la jied pat sa tang 10 ngut ki ban long kum ki ‘Finalist’ ki ban kynthup naduh kiba shad haduh kiba rwai.
La ong ruh ba ka khusnam na ka bynta kiba ïoh rah ïa ka nam lahduh kin ïoh da ka song pisa kaba T.2 lak ha ryngkat ka ‘trophy’, katba kiba wan ba ar kin ïoh ïa ka song pisa kaba T.1 lak bad ba lai pat kin ïoh rah ïa ka song pisa kaba T.50 hajar.
Nalor u Director bad ki nongïashimbynta ha kane ka sngi, la ïadonlang ruh da u Bah Starfing Pdahkasiej uba la long kum u kongsan bad uba la pyllait paidbah ruh ïa katei ka ‘trophy’.
U Bah Niman u la pyntip ruh ba ka rukom bishar ha kane ka jingïakob ka long 70% ka vote kan dei na ki nongbishar bad 30% kan dei na ki paidbah. La ong ruh ba kino-kino ki nongïashimbynta kiba jop haduh lai sien kynthih ha kane ka Khasi Jaiñtia Got Talent, na ka liang ka Foundation kan ïarap ban pynshna da ka ïing ïa ki nongjop.
U Bah Niman u la pyntip ruh ba kane ka jingïakob kam dei kaba thok ba shukor hynrei ka dei kaba la pynïaid na ka bynta ka jingthmu kaba bha bad ong ruh ba kum ka kynhun ka khlem ïoh jingïarap pisa nangno-nangno ruh hynrei ïa ka jinglut-jingsep baroh, ki nongpynïaid ki la hap ban tip hi.
“Ngi shaniah ha ki paidbah ba kin ai ka jingkyrshan bad ha kajuh ka por, ngi ap ïa ka rai jong u paidbah ba lada u paidbah u ai ïa ka jingkyrshan ïa ka Foundation jong ngi, nangne shakhmat ngin dang ïaleh ïa kine ki kam ha kiba bun tylli ki snem”, ong u Bah Niman.
Na ka liang u Bah Starfing u la ai ruh ka kitbok-kitrwiang ïa katei ka kynhun ba kan nym kut tang ha ka ban pynlong ïa katei ka jingïakob hynrei ban dang lah ban bteng shuh-shuh ban pynlong ïa kum katei ka jingïakob shad bad rwai namar ba kum ka jaidbynriew bad kum ki samla, ki don shisha ïa ka sap-ka phong hynrei ka jingeh ka long ba ki samla kim don satia ïa ka lad ne ka rynsan ban pyni ïa ka sap-ka phong jong ki.
