Khliehriat, Naiwieng 03
Ka Khasi Students’ Union, Narpuh Circle ka la pynkup burom ïa 28 ngut ki samla da ka ’13th Maitshaphrang Award’ ha ka jingïalang kaba la long ha Christian Secondary School, Lumshnong ka 1 tarik Naiwieng.
Kine ki samla kiba shah pynkup burom ki dei kiba wan haka kyrdan ‘1st Division’ ha ka SSLC, HSSLC, Degree bad Master’s Degree jong ka snem 2024.
U samla Streamly N. Suchen, President ka KSU-EJHDU u la long kum u kongsan bad ha ka jingkren jong u, u la ong ba ka jingthmu ba ka KSU ka la pynlong ïa kane ka jingpynkup burom ha kylleng ka Khasi-Jaiñtia ka long ban pynshlur ïa ki samla ha ka pule-puthi.
Kiwei kiba ïadonlang ha kane ka jingïalang ki kynthup u samla Cherity Suja, Asst. Finance Secretary, KSU-EJHDU kum u Symbud Kongsan, Principal ka Christian Secondary School, Lumshnong, u G. Khonglah, S. Pynkhlong, President barim ka KSU-Narpuh Circle, Shaniahskhem Dkhar, Finance Secretary KSU-EJHDU, u Deniwan Lyngdoh, Organising Secretary KSU-EJHDU bad ka jingdonlang ki dkhot KSU Narpuh Circle, ki khynnah skul ka Christian Secondary School, Lumshnong bad ki nonghikai jong kane ka school. La pynïaid ïa ka program da u Bah K.S. Suchiang, President KSU-Narpuh Circle.
