Shillong, Naiwieng:
U nongrwai ba pawnam ha pyrthei, u IYAZ u la wan pynshongshit ha ka taïew ba la dep ïa ka nongbah Shillong ha ka jingwan rwai sha India. Kumba 2,500 ngut ki paidbah nongkyrshan ki la leit sakhi ïa une u nongrwai.
Ïa kane ka tamasa la pynlong da ka Fav Events ha ryngkat ka jingïatreilang bad ka Courtyard by Marriott Shillong, kaba la pynlong ha Lariti, Mawdiangdiang, bad kane ka tamasa ka la long kaba shongshit naduh kaba sdang haduh kaba kut.
Kane ka tamasa ka la sdang ha ka por 2.00 nohphai sngi bad ki nongrwai bapawkhmat na nongbah Shillong ki kynthup ïa ka Jessie Lyngdoh, Lily bad Banshan, Zethan, bad ka Meban.
Kiwei pat ki kynthup ïa u DJ pawnam na Goa, u Wish uba la pynshongshit ïa ki paidbah nongsngap kiba la ïashad mastieh ha madan. Ka jingshongshit kaba kham paw hangne ka dei hi lyngba u IYAZ uba la sei shisha ïa ka sap rwai ba kyrpang kaba pynsah kynmaw shisha ïa ki paidbah.
Hadien ka jingrwai, la khot sngewbha ïa kiba shah khot kyrpang ban bteng ïa ka jinglehkmen sa ïa ka IYAZ After Party kaba kyrpang kaba la pynlong ha Cosmos Banquet Hall, Courtyard by Marriott Shillong, kaba la pynkut ïa ka miet da kaba kham bun ki jingrwai, ki jingbam, bad ka jinglehkmen. Hadien kane u IYAZ u la leit sa sha Mizoram na ka bynta ka tamasa rwai kaba bud.
