Shillong, Naiwieng 03
U President ka UDP East Khasi Hills District, Bah Titosstarwell Chyne, u la pyntip ba sa tang lai tylli ki konstitwensi kiba hap ha East Khasi Hills District kim pat ïoh kyrtong haduh mynta ban pynkhreh ïakhun ïa ka ilekshon MDC na ka bynta ka Khasi Hills Autonomous District Council (KHADC).
Haba buddien ïa ka jingpynkhreh ïa ka ilekshon MDC, u Bah Titos u la ïathuh ba napdeng ki khatwei tylli ki konstitwensi, ka UDP ka la ïoh kyrtong haduh phra tylli ki konstitwensi kynthup ïa ki konstitwensi ba la don lypa ki MDC bad ïa ki konstitwensi kiba la don ki MLA. Haba kylli kiei kita ki konstitwensi bym pat ïoh kyrtong, u la ïathuh ba kin sa pyntip ynda la dei ka por.
U Bah Titos u la ïathuh ba hapoh ka 6 tarik u Nohprah 2024 baroh ki Jylli ne ki konstitwensi ki hap ban phah noh ïa ki kyrteng jong ki kyrtong sha ka District bad na ka district kin sa phah sha ka State Election Committee khnang ban ïoh pynbna ha kajuh ka por ïa ki kyrteng jong baroh 29 tylli ki konstitwensi.
U Bah Titos u la ïathuh ba ki don ki konstitwensi kiba la don ki MLA kim pat phah ïa ka kyrteng jong ki kyrtong hynrei ki la dep don lypa u kyrtong ba kin sa phah ynda la dei ka por ban sa pynbna da ka State Election Committee jong ka UDP. Katkum ki khubor ba la ïoh lum ba don ki konstitwensi ba don MLA hynrei ka UDP ka shem shitom bha ban wad kyrtong namar bun na ki nongkitkam ba hakhmat ki kynran dien lut naduh ba ka UDP ka shah rem kput ha ka ilekshon MP Lok Sabha.
