Shillong, Naiwieng 03
Ka Joint Action Committee (JAC) Hima Sohra ka la ujor sha ka Khasi Hills Autonomous District Council (KHADC) pyrshah ïa u Syiem jong ka Hima Sohra u Pa’iem Freeman Sing Syiem da kaba kynnoh ba u la kam trai jubor ïa ka shnong Mawspong, Hima Sohra.
Ha ka shithi ujor ba la aiti sha u Chief Executive Member jong ka KHADC ha ka 6 tarik, Nailar, 2024 bad kumjuh ruh ka jingujor ba la ai ha ka 10 tarik Risaw, 2024, u Chairman jong ka JAC Hima Sohra u Bah Pynskhemborlang Sawian u la pynpaw ba u Bah Brawell Rynjah (Phanwanjah) u dei u khun ksiew pateng jong ka (L) Mihlah bad u dei u rangbah kur jong ka kur Rynjah (Phanwanjah). Ka kur jong u Bah Brawell Rynjah (Phanwanjah) ki dei ki trai jaka kaba don ha ka shnong Mawspong, Hima Sohra bad ïa kane ka jaka la hiar pateng bad ïoh pateng naduh ka (L) Mihlah Rynjah (Phanwanjah) bad kane ka jaka ka don kumba 1,50,00,000 sq. mitre tam ne duna.
Ha ka jingujor, la kynnoh ba u Syiem ka Hima Sohra u Pa’iem Freeman u la leh donbor bad u la kam trai ïa katei ka jaka jong ka Kur Rynjah Phanwanjah khlem da don ki kot ki sla kiba pynshisha ba kan dei jong ka Hima Sohra.
U Chairman ka JAC u la kynnoh ba u Pa’iem Freeman Sing Syiem mynba u la shah sospon naduh ka 28.08.2018 u la leh donbor da kaba u la soi beaiñ ïa ka No Objection Certificate (NOC) die jaka sha ka Kong Baïadalin Rose Lyngdoh ha ka 10 tarik, Nailur, 2018 bad kynnoh shuh shuh ba u Syiem ha kane ka por ba la shah sospon u la leh donbor da kaba sei beaiñ ïa ka pisa jong ka Hima kaba kot sha ka T.5 lak bad ïa kane ka pisa u la sei ha ka lai bynta. T.50 hajar u la sei ha ka 30.08.2018 na ka Meghalaya Cooperative Apex Bank Sohra Branch, T.4 lak u la sei ha ka 31.08.2018 na ka Meghalaya Cooperative Apex Bank Sohra Branch bad T.50 hajar u la sei ha ka 28.08.2018 na ka State Bank of India, Sohra Branch.
“Ïa kane ka jingsei tuh ïa ka pisa ka Hima Sohra la tip na u Public Information Officer (PIO) ha ka jubab RTI kaba u Bah Brawell Rynjah (Phanwanjah) ha ka 15.04.2019 u la pan jingtip halor ka jingleh jong u Syiem ka long kaba beaiñ,” la ïathuh u Bah Sawian.
U Bah Pynskhemborlang Sawian u la pynshisha ïa ka hok longtrai jong ka Kur Rynjah (Phawanjah) halor ka jaka ha ka shnong Mawspong lyngba ka Order dated 05.04.1940 on Misc Political Case No. 118 of 1932 ba la thoh shai ba u Keeson Syiem uba dei u Syiem Maharam u la kubur ba u dei ban siew ha ki Mawphu ba u la bam ïa ka jaka ka jong ki.
U la kdew ruh katkum ka hukum ba la pynmih ha ka 11.08.33 da u Deputy Commissioner, Khasi and Jaiñtia Hills u K Cantlie ha ka mukotduma Syiem of Maharam pyrshah ïa u Syiem of Cherra State.
“Kane ka pyni ba katkum ka hukum la kdew shai ba ka Mawspong kam dei ka jaka jong u Syiem ka Hima Sohra hynrei ka dei ka jaka shimet jong u Borsing uba dei u Kñi jong u (L) Ewell bad (L) Dro bad kumjuh ruh u dei u kñi tymmen jong u Bah Brawell Rynjah (Phanwanjah) bad ruh u dei na ka kur ka jait Rynjah (Phanwanjah).
Halor ka jingïapynbeit pud hapdeng ka Seng Mawphu 16 shnong bad ka Hima Maharam ha ka 10.01.1942, u Bah Sawian u la ong ba kine ki arliang mamla ki la ïahun lang katkum ka jingïapynbeit bad u Syiem ka Maharam ruh u la hun da kaba u la soi ïa ka kot jingïasuk.
“Ngi ïohi ba u Syiem Sohra um don bynta eiei halor katei ka jaka namar ba katei ka jaka kam dei ka jong u Syiem Hima Sohra hynrei ka dei ka jaka jong u (L) Ewell bad ka shnong Mawphu,” u la ong.
U la pynpaw ruh ba u Bah Brawell Rynjah (Phanwanjah) u la pynshisha ba katei ka jaka ka dei ka jong ki lyngba kane ka kot. Ha kane ka kot la kdew ruh ba ki jait Malngiang ki rep ki riang hapoh ka khyndew Mawspong kaba dei jong ka Kur Phanwanjah. Ïa kane la lah ban pynshisha ha ka Dulir Jingpynshisha kaba 25.05.1991 ba la pynshisha da ki jait Malngiang na ka shnong Mawphu bad mynta ki la shong la sah ha Dinat bad Mawspong bad kane ka khyndew ba ki rep ki riang ka dei jong ka Kur Phanwanjah.
U Bah Sawian u la kynnoh ruh ba u Syiem u la pynkheiñ ïa ka riti ka dustur jied Rangbah Shnong hapoh ka shnong Mawspong, Hima Sohra namar katkum ka Hukum u Syiem Joinmanik Syiem (Bam kwai ha dwar u Blei) la hukum ba baroh ki Rangbah Shnong jong ki shnong kiba hap hapoh ka Hima Sohra ki dei ban long da ki briew kiba la kha la pun ha kato hi ka shnong. Hynrei kaba lyngngoh ka long ba u Rangbah Shnong ba mynta jong ka Shnong Mawspong u Bah Swing War um dei satia u trai shnong ne uba la kha la pun ha ka shnong Mawspong hynrei u dei u nongshong shnong jong ka shnong Umlangmar, Nongspung Syiemship bad u dei uba shu leit shongkha hapoh ka shnong Mawspong.
“Na ka liang jong nga, nga kyrpad ïa ka KHADC ban shimkhia halor kane ka bynta bad ruh ban khot hajir biang sa shisien ïa u Syiem Sohra bad ïa u Bah Brawell Rynjah (Phanwanjah) bad kiwei ki rangbah ban wanrah ïa ki kot ki sla ban pynshisha ïa ka hok longtrai ïa ka jaka kaba don ha Mawspong bad ban pynshitom ïa u Syiem halor ka jingleh donbor jong u ïa ki khun ki hajar jong ka Hima Sohra, “la ong u Bah Sawain.
