Jowai, Naiwieng 03
Ka Dorbar ki Waheh Kur Ri Jaiñtia ha ka 2 tarik Naiwieng ka la pynlong ïa ka jingïalang ha Ïungwalieh ka Dorbar Shnong Chillaingraij ban pynbor ïa ka Jaiñtia Hills Autonomous District Council (JHADC) ba kan thaw ïa ka aiñ ban ithuh ïa ka Kur ka jait kmie.
Ha kane ka jingïalang la wan ïashim bynta da ki President, Chairman, General Secretary, ki seng Kur bad kiwei kiwei.
Hadien ka jingïakren ïatai, ka Dorbar ki Waheh Kur Ri Jaiñtia ka la shim ïa katto-katne ki rai ban kyrpad na u CEM jong ka JHADC ban ithuh da ka aiñ ïa ka Kur ka jait kmie ha ka khyrnit hynriew katkum ka riti treikam jong ka Ri India bad ban pynrung ïa ka Kur ka jait Kmie ha ka riti treikam ka ri India.
La rai ruh ban kyrpad ïa u CEM ka JHADC ban pynkloi ban thaw ïa ka aiñ ïa ki Kur kiba shim ïa ka Kur ka jait na ka kmie, ki dorbar, ki seng bad ki nongkitkam ka kur kiba la dep ban pynrung ïa ki kyrteng Kur sha ka Secretary Executive Committee jong ka JHADC katkum ba la buh por da ka EC.
La rai ruh ban dawa na ka EC ka JHADC ban ithuh kloi ïa ki Kur bad ki Seng, Dorbar Kur kumjuh ki nongkitkam khnang ban phah kloi sha ophis u Deputy Commissioner ka West Jaiñtia Hills District bad East Jaiñtia Hills District bad ba kin lah ban ai ïa ka syrnot Schedule Tribe tang ïa ki Kur kiba la ithuh da ka aiñ lyngba ka JHADC.
Kumjuh ka ophis u Deputy Commissioner ka East bad West Jaiñtia ruh kin pdiang ïa ka NOC na ki Waheh ka Kur kiba la ithuh da ka aiñ kumjuh ïa ki longkmie kiba ïoh kurim khyllah jait kiba pan syrnot Schedule Tribe ïa ki khun ki jong ki. La rai ruh ban kyrpad na u CEM ka JHADC ban ailad ïa ki Kur ki bym pat dep pynrung ïa ki Kur hapoh ka JHADC.
Nalorkata, la rai ruh ban kyrpad ïa u CEM ka JHADC ban kyrpad ïa u Myntri Rangbah ka Jylla ba un thoh sha u Myntri Rangbahduh ka ri India ban ithuh tang ïa ki jaidbynriew Khasi, Jaiñtia bad Garo kum ki trai ri trai muluk katkum ka aiñ Schedule Tribe bad kiba don hok ha ka Sorkar Jylla.
