Nongstoiñ, Naiwieng 03
Ka Joint Action Committee Lai Polling Station ha ka Sngi Saitjaiñ jong ka taïew ki la shim ïa ka rai ba naduh ka 9 tarik mynta u bnai, ki paidbah ka Nongtrai Sepngi kin leit ban dih sha bad bam ja ryngkat bad u Bah PN Syiem lem bad u Bah Pynïaid Sing Syiem ha phyllaw lane hakhmat jong ka shlem treikam ka Khasi Autonomous District Council (KHADC) ha ryngkat ki placard ha la ki kti.
U Chairman ka JAC, Bah Jeremiia Dkhar ha ka kyrwoh khubor ba la phah u la pyntip ba ïa kane ka rai la shim ha ka jingïalang paidbah ha Mawsmai kaba la long ha katei ka sngi.
Shuh shuh u Bah Jeremiia u la ong ruh ba ka JAC ka pynpaw ba lada jia eiei kaba sngewsih ïa ki paidbah na 21 tylli ki shnong, u Bah Pynïaid Sing Syiem, CEM bad u Bah PN Syiem, Deputy CEM bad ka KHADC kan dei ban shim ïa ka jingkitkhlieh.
Shuh shuh la ong ruh ba katei ka rai ka dei ka rai kaba khatduh hadien ba ki paidbah ha kane ka sngi ki ïa poi ryntih namar ka jingsngap mynthi jong ka KHADC.
U la ong ruh ba ki nongïalam jong ka JAC ryngkat ki paidbah jong 21 tylli ki shnong ki la pynpaw ïa ka jingbynñiaw halor ka jingïai sngap man-man jong ka KHADC ïa ka jingdawa shongnia jong ki paidbah na 21 tylli ki shnong. Kum ban shu pynkynmaw ba ka jingdawa jong ka Joint Action Committee Lai Polling Station ka long ban pynphai biang ïa ki 21 tylli ki shnong sha Mawshynrut Konstitwensi ba la pynhap da ka Selection Committee sha ka Rambrai-Jyrngam Konstitwensi.
