Shillong, Naiwieng 04
Ka Executive Member jong ka Khasi Hills Autonomous District Council (KHADC) ka Kong Grace Mary Khar-puri kaba khmih ïa ka tnat Ïew ha ka Lah Sngi U Blei ka la lum ïa ka jingïalang jong ki nong-khaïi na ka Mawïong Regulated Market (MRM) kaba don ha Mawïong na ka bynta ban ïakren bad ïatai halor ka jinghiar dor jong u synsar kaba la ktah jur ïa ki nongrep.
Haba kren sha ki lad pathai khubor hadien ba la wai ka jingïalang, ka Kong Grace ka la ong ba ka jingkhot ïa kane ka jingïalang ka dei halor ka jingud-jingnam jong ki nongrep synsar ha kaba ïadei bad ka jinghiar jong ka dor ka mur u synsar kaba la ktah shi katdei ïa ki kiba ju im jakpoh na kane ka kam.
Ka EM ka la ong ba ha kane ka jingïalang bad ki nongkhaïi na ka Mawïong Regulated Market la ïoh ban ïatai bad ïathir sani kumno ban wad ki lad ki lynti ban weng ïa kane ka jingeh kaba kum ki nongrep ki mad na kawei ka por sha kawei pat. Ka la ong ba u synsar u dei uwei na ki mar rep kaba long ka lad kamai-kajih jong ki nongrep ban bsa bad pyndap ïa la ka ïing ka sem. Ka la ong ba u synsar um dei shuh u mar khlaw hynrei u la dei u mar rep bad kum ka tnat ka dap da ka jingsngewkhia haba ïoh ka jingud-jingnam na ki nongrep.
Shuh shuh ka Kong Grace ka la ong ba kawei na ki daw jong ka jinghiar dor u synsar ka long ba ka jingpynmih ïa une u mar ka la long kaba palat liam, ym dei tang na Meghalaya hynrei na kiwei ruh ki jylla bad wat ruh na kiwei ki ri, ha kaba ka la ktah jur ïa ka dor. Kawei pat ka daw ka dei jong ka jingwan rung beaiñ jong ki nongkhaïi nabar jylla ban leit thied beit-beit ïa u synsar na ki nongrep, kane ruh ka la ktah shibun ïa ka dor, namar ïa ka dor la shu buh beit da kine ki nongkhaïi. Lada shu ai nuksa, lada kine ki nongkhaïi kiba wan nabar ki buh ka dor 3 tyngka, ki nongkhaïi kiba don ha Mawïong Regulated Market ruh kim lah shuh ban kyntiew ne pynheh ïa ka dor.
Ka Kong Grace ka la ong ruh ba kawei pat ka daw ka dei ka jingduna jong ki Regulated Market, ha kaba don tang kawei ha East Khasi Hills, kumta ka la i donkam ban don shuh kum kine ki ïew ha Ri-Bhoi, West Khasi Hills. Ha kaba ïadei bad kane, kan sa rah ban ïakren bad ka Sorkar Jylla na ka bynta ban shimkhia halor kane ka jingeh jong ki nongrep synsar.
“Ngin hap ban rah ban pynsngew sha ka Sorkar Jylla, khamtam ba kum ka Mecofed ruh kan treikam biang. Ngin sa pyrkhat sani bha, yn sa rah ïa kine ki jingeh bad ki jingduna baroh sha ka Sorkar ban ïatreilang kumno ban pynmyntoi pat ïa u nongrep,” la ong ka Kong Grace.
