Shillong, Naiwieng 04
U Working President ka United Democratic Party (UDP), Bah Titosstarwell Chyne u la ong ba ka long ka jingshisha haba mih seng saiñpyrthei thymmai ka ju khate ïa ki vote jong kiwei pat ki seng saiñpyrthei, ym dei pat ba ka khate tang ïa kawei ka seng, namar ki paidbah ha ki ilekshon hapoh ki konstitwensi kim peit tang ïa ka seng hynrei ki peit ruh ïa ki kyrtong.
Kane ka jingong jong u ka long halor ka jingmih ka Voice of the People Party (VPP) ka ban ïakhun ha ka sien ba nyngkong ïa ka ilekshon MDC.
“Ngim lah ban len ba ka lah ban khate ïano-ïano ruh, hynrei kam lah pat ban khate ïa ka vote jong tang kawei ka seng,” u la ong da kaba ai nuksa ba ka Congress ruh ka la hiar bha mynta, katba ha ki por mynshwa ka don bun ngut ki MLA/MDC, kumjuh ka UDP na ka 6 ngut ki MLA ha u snem 2018 ka kiew sha ka 12 ngut ha ka ilekshon 2023.
“Ka ilekshon kaba dei tang ha ki konstitwensi ka ïapher,” u la ong shuh shuh.
Haba kylli haduh katno ka jingmih jong ka VPP kan ktah ïa ki seng riewlum, u la ong ba ïa mynta ym pat lah ban ong ei-ei namar ha ki ilekshon hapoh ki konstitwensi, ki paidbah kim da peit eh tang ïa ka seng, hynrei ki peit ruh ïa ki briew kiba ïakhun ïa ka ilekshon ki dei ki kyrtong kiba kumno. “Ngam ong eh ba ka VPP kan nym ïoh lane kan ïoh bun, hynrei nga sngew ba ha ka ilekshon MDC ka ban wan baroh ki seng saiñpyrthei kin ïoh ïa ki MDC ban mihkhmat,” la ong u Bah Titos uba dei ruh u MDC ka UDP na Sohra. Ha kawei ka liang, u Nongïalam ka UDP u la ong ba ka jingong ba ka ilekshon MDC ka lah ban jlan biang lane kan nym pat long lada wanrah ïa ka jingpynkylla hapoh ka Sixth Schedule, ka dei tang ka jingmutdur.
“Kane ka dei tang ka jingmutdur jong ki paidbah, ki nongïalam, ki seng saiñpyrthei bad wat ki MDC ruh,” u la ong.
U Bah Titos u la ong ba kane ka samoi treikam ki MDC ba mynta la pynslem shaba palat, bad na ka liang ka UDP kumba ba ka ju ong barabor ba dei ban pynlong noh ïa ka ilekshon, tang shu kut kane ka jingpynjlan kan ïakren biang bad ka Sorkar ba ka dei ban pynlong noh ïa ka ilekshon.
