Shillong, Naiwieng 04
Haduh kumba 36 ngut ki briew ki la ïap hadien ba kawei ka bos kaba kit 42 ngut ki nongleit nongwan ka la noh bad hap ha kawei ka riat kaba don hajan Marchula ha Almora ha Uttarakhand kaba la jia ha ka step jong ka Lah Sngi U Blei.
Katkum ka jingïathuh ki heh Sorkar, katei ka bos kaba shong 42 ngut, ka dei kaba dang don ha lynti sha Ramnagar na Kirath jong ka Nainidanda, la ong ba haba poi ha katei ka jaka, u nongñiah um shym la lah ban tehlakam shuh ïa ka kali bad hap ha ka thliew kaba don hajan Marchula Band. Katkum ki khubor ba nyngkong la ïathuh ba katei ka jingjia aksiden ka long kaba jur haduh katta-katta ba bun ki briew ki la shah bret shabar jong ka bos bad ki la hap sha kawei pat ka liang.
U District Disaster Management Officer (DDMO) ka Almora u Vineet Pal, u la pynthikna ïa ka jingdon jong ki briew kiba la mynsaw bad ong ba ka jingpyllait im, ka dang ïaid shakhmat bad ka jingïap, ka lah ban nang kiew shuh shuh.
“Katei ka jingjia ka la jia ha ka step jong ka Lah Sngi U Blei bad ki bor synshar district ki la ïoh jingtip halor ka jinghap jong ka bos ha ka riat kaba jylliew 150 meter ha ka por kumba 8.45 eiei mynstep. Ka kynhun jong ki pulit ka State Disaster Response Force na Dhumakot ki la dep ban poi sha katei ka jaka bad la sdang ruh ban pynlait im. Kawei pat ka kynhun ruh ka dang poi sha katei ka jaka”, u la ong.
U Myntri Rangbah ka Uttarakhand u Pushkar Singh Dhami u la pynbna ba katto-katne ki heh kiba ïadei bad u Assistant Regional Transport Officer ki shah sospon ha ki jaka ba shah ktah kum ka Pauri bad Almora. U la pynbna ruh ban ai jingïarap pisa haduh 4 lak tyngka na ka bynta kiba la khlad bad 1 lak tyngka na ka bynta kiba mynsaw. Nalor kata, u la bthah ruh ïa u Commissioner jong ka Kumaon Division ban sdang ïa ka jingtohkit majistor halor kane ka jingjia.
“Ka long shisha ka khubor kaba sngewsih ban ïoh pdiang halor ka jingmynsaw bad ïap jong ki nongleit nongwan ha ka jingjia aksiden bos kaba la jia ha Marchula jong ka district Almora. La bthah ïa ki bor synshar district ban pynlong ïa ki kam ai jingïarap bad pyllait im. Ki bor synshar bad ki kynhun SDRF ha katei ka jaka ba jia katei ka jingjia ki dang trei stet ban pynkynriah noh ïa kiba mynsaw bad ban rah sha ka jaka sumar kaba jan tam ban ïoh jingsumar. La ai ruh ïa ki jingbthah ban pynkit da ka liengsuiñ ïa ki nongleit nongwan kiba mynsaw jur lada donkam,” ong u Dhami ha ka rynsan X tang hadien kane ka jingjia.
