Shillong, Naiwieng 04
U Bah Enlang Sawian uba dei u Muktiar bad ha kajuh ka por u nongïalam ka Hynñiewtrep Youths’ Council (HYC) Sengkmie, u la pynshai sha ki paidbah ka Jylla ha kaba ïadei bad ka ‘Zero FIR’ kaba dei ka jingujor ejahar kaba lah ban ai la ka dei ha kano-kano ka thanat pulit da ki nongujor.
U Bah Enlang u la pynshai sha ki paidbah ka Jylla khamtam sha ki paidbah ka thaiñ nongkyndong kiba dang bun ki bym pat tip ïa kaba kum kane ka jingujor ejahar ne kata ka ‘Zero FIR’.
Kaba la pynlong ïa une u samla ba un mih shakhmat ban pynshai sha ki paidbah halor kane ka bynta ka long namar ba ka don ka jingïatyngkhuh kaba u la ïakynduh haba u leit ban ujor ejahar sha ki thanat bapher-bapher haba ki don kiba shah thombor bad u la lap ruh ïa kiba bun ki nongshah thombor haba ki leit ban ujor ki don ki Thanat pulit kiba kyntait ban shim ïa ki jingujor na ki nongshah thombor da kaba ai daw ba ka jingjia kam hap ha ka jingkhmih lane ka jingpeit jong kata ka thanat kaba don shabar na ka jaka ba jia ki jingjia shah thombor.
“Ka thong jong kane ka ‘Zero FIR’ ka long ban ïada lane ban pynsted ïa kata ka mukotduma lada ki paidbah ki ujor bad khamtam eh ban ïada ïa u nongkynnoh lane ïa kito ki briew kiba donkti ha kano-kano ka kam lehsniew jong ki ba kin ïalam bakla ne ban pynjot ïa ki sakhi-satar bad kumjuh ruh ban pynjah noh ïa ki nongsakhi ha kino-kino ki jingjia shah ujor”, ong u Bah Enlang.
Shuh-shuh u la ong ba ka don ka kyndon hapoh ka CrPC lane kata ka Bharatiya Nyaya Sanhita, 2023 ïa kaba la tip mynta bad kumjuh ruh lyngba ka Justice Verma Committee bad ruh lyngba ka jingpyntip ba la pynmih da ka Tnad Kam Pohïing ka Sorkar Pdeng ha u snem 2013, kaba aibor ïa ki paidbah ban buh ïa ki jingujor ha kano-kano ka thanat pulit kiba don ha ki Jylla, haba ki don kino-kino ki jingjia shah thombor pyrshah ïa ki, khlem da donkam ban ap lane ban leit buh ïa ki jingujor jong ki tang ha ka thanat pulit kaba dei peit lane khmih ïa ka jaka ba jia kino-kino ki jingshah thombor lane ki jingïakajia.
Nalorkata, u Bah Enlang u la ong ruh ba lyngba ka jingujor da ka ‘Zero FIR’, ka dei ka kamram jong ki pulit kato ka thanat ba la ujor ïa ka ejahar ba kin ai bad pynthikna ïa ka jingsumar sha kino-kino ki nongujor lane kiba shah ujor lada don kino-kino ki jingjia.
“Ka ba ar ka jingmyntoi jong kane ka ‘Zero FIR’ ka long ruh ba ki pulit kiba ïohpdiang ïa kato ka ‘Zero FIR’, ki lah ruh ban leit kem lane ban leit bat ïa u nongleh kam sniew hangto-hangto khlem da donkam ban ap ïa kawei pat ka thanat kaba don ïa ka bor ban tohkit ïa kata ka jingjia”, ong u Bah Enlang.
Kumta, u la pynshlur bad pynshai sha ki paidbah ki bym pat tip bad shai halor kane ba haba ai da ka ‘Zero FIR’ la ka dei hangno-hangno ka jaka ruh ki lah beit ban ujor bad ki thanat pulit ruh ki dei beit ban pdiang ïa ka jingujor bad na kata ka thanat pulit ba pdiang ïa ka jingujor, kan sa pynpoi sha ka thanat kaba dei peit ïa ki nongshah thombor ne nongujor.
