Shillong, Naiwieng 04
U Bah Titosstarwell Chyne uba dei u MDC ka UDP na Sohra bad u Nongïalam Liang Pyrshah ha Khasi Hills Autonomous District Council (KHADC) u la ong ba hapoh kane ka samoi treikam ki MDC ka la thaw ïa ka khana-pateng (history) da kaba la lah ban ïoh bun tylli ki aiñ haba ïanujor bad kiwei pat ki samoi treikam.
“Dei tang ha kane ka samoi ba la lah ban thaw bun tylli ki aiñ, ym dei tang ha ka por ba long CEM ma nga, hynrei mynta ba long u Bah Pynïaid ruh ka la thaw ïa ka histori”, u la ong. Haba pynpaw ïa ki aiñ ba la wanrah ha ka por ba u la long kum u CEM, u Bah Titos u la ong ba hapoh ka executive committee ba la ïalam da ka UDP la lah ban pynïoh ïa ki aiñ ba kynthup ïa ka Land Act, ka Solid Waste Management Act, ka Village and Town Development Council bad ka Amendment of Market Act.
Haba kynthoh halor ki hynriew tylli ki aiñ ba ka KHADC ka la ïoh muhor na u Lat dang shen, u Nongïalam Liang Pyrshah u la ong ba kine ki aiñ ki dei kiba la don lypa bad kiba la shu wanrah ïa ki jingpynkylla.
“Ban pynkham bor ha ki rangbah shnong ka long kaba dei palat, hynrei hap ban ïa peit ha kano ka rukom ki pyntreikam ïa ki,” u la ong halor ka aiñ Administration of Elaka.
“Ki aiñ kiba kham khlaiñ shuh-shuh ban ïa ki aiñ ba la wanrah da ka KHADC ki dei ki jinglong tynrai ka jaidbynriew ïa kiba la ïada lyngba ka Sixth Schedule”, la ong u Bah Titos.
