Shillong, Naiwieng 04
Ka Election Commission of India (ECI) ka la pynbeit thymmai ïa ka jingpynlong ilekshon MLA shiteng samoi ha ki 14 tylli konstitwensi ha ki lai tylli ki jylla ha Kerala, Punjab bad Uttar Pradesh da kaba pynkynriah ïa ka sngi thep ‘vote’ na ka 13 tarik Naiwieng sha ka 20 tarik Naiwieng.
Ka ECI ka la pynbna ïa kane ka jingpynkylla ha ka Lah Sngi U Blei tangba ym don jingpynkylla ïa ka sngi thep ‘vote’ ha Gambegre konstitwensi bad kan long beit ha ka 13 tarik Naiwieng.
Ka ECI ka la ong ba kane ka jingpynkynriah ïa ka sngi thep ‘vote’ ha ki 14 tylli jylla ka la wan hadien ba la ïohpdiang ïa ki jingpynsngew bad jingkyrpad na ki seng saiñ pyrthei kiba la kyrpad ban pynkylla ïa ka sngi thep ‘vote’ ha ka ilekshon shiteng samoi namar ka jingdon ki tamasa, jinglehniam bad jingrakhe bapher-bapher.
Ki 14 tylli MLA konstitwensi ki kynthup kawei ka konstitwensi ha Kerala (Palakkad), 4 tylli ha Punjab (Dera Baba Nanak, Chabbewal (SC), Gidderbaha, bad Barnala) bad 9 tylli ki konstitwensi ha UP (Meerapur, Kundarki, Ghaziabad, Khair (SC), Karhal, Sishamau, Phulpur, Katehari, bad Majhawan).
Ka jingthep ‘vote’ ha kine 14 tylli ki konstitwensi yn pynlong ryngkat lang bad ka ilekshon shiteng samoi ha Nanded konstitwensi ha Maharashtra bad Kedarnath konstiwensi ha Uttarakhand.
Ha Punjab, ka don ka jingrakhe kum ka Kalpathi Rastholsavam, Kartik Purnima bad Prakash Parv jong u Guru Nanakkaba kaba hap hapdeng ka 13 tarik bad 15 tarik Naiwieng kaba donkam ban kynriah ïa ka sngi thep ‘vote’ khnang ba ki nongthep ‘vote’ kin ïoh ban ïashimbynta bha ha ka sngi thep ‘vote’ ha ka 20 tarik Naiwieng.
Kumta ka jingñiew ‘vote’ kam don jingkylla, bad yn pynlong beit ha ka 23 tarik Naiwieng.
