Shillong, Naiwieng 04
U Nongïalam ka Congress uba dei u MP na Tura, u Saleng A Sangma u la ong ba ka ilekshon shiteng samoi ha Gambegre ka la ai jingsneng bad pynbor ïa ka Sorkar ban hiar sha madan, ha kaba u la ong ba kam pher la ka Congress ka jop ne ka rem, hynrei u la shim lypa beit ba ka dei ka jingjop ïa ka ilekshon.
U la ong ba um pat ju ïohi ba u Myntri Rangbah un leit ban rung ïing wat ha ka konstitwensi lajong ruh, hynrei ha kane ka ilekshon ha Gambegre u la leit kynthih lut sha man la ki jaka ba um dei ban leit ruh.
“Tang namar ka kurim jong u, u la leit ha man la ki tyngkong ïing, ki dong bad ki kyntoit. Nga kmen ba lyngba ka Gambegre ilekshon ka la pynbor ïa ki ban hiar sha madan ban ïohi ïa ka jingshisha ba ki paidbah ki ïakynduh,” u la ong.
Katkum ka jingong u Saleng, baroh ki Myntri Sorkar, u Lamphang ka Ïingdorbar bad jan baroh ki MLA ki la leit rung lut sha ki kyndong-kynshrot jong ka konstitwensi barim jong u ban khroh ïa ki vote.
U la ong ba kane ka jingleit ïalap ilekshon jong ki ban rung khlem da kheiñ shuh ïa ki kyndong-kynshrot ka pyni ba ka NPP ka la shah pynma bad ka sngew syier ïa ka bor jong ki paidbah.
“Ki paidbah ha Gambegre ki la jop shisha ïa kane ka ilekshon naduh mynta; hato phi la ju ïohi ba u Myntri Rangbah, u Lamphang, u Symbud Myntri Rangbah bad baroh ki Myntri Sorkar kin leit rung ha man la ki thliew ïing tang ha kawei ka konstitwensi,” u la ong da kaba bynrap ruh ba kane ka dei ka bor jong u paidbah.
Haba kylli, u Saleng uba dei u MLA barim ka Gambegre u la ong ba ym tang ba la pyndonkam da ka bor pisa ha kane ka ilekshon, hynrei la pyndonkam ruh da ki bor jong ka Sorkar bad mynta u paidbah u la tip bad sngewthuh ba ki don ka bor ban pynbor ïa u Myntri Rangbah bad u ïa u Lamphang ban hiar sha madan.
Haba kylli shuh shuh, u Saleng u la ong, “Ka NPP ka sheptieng ïa ki paidbah ym ïa ka seng Congress, lada ki paidbah ka Gambegre kim jied ïa u bad ïa ka seng Congress, ka NPP kan ym leit nguh leit dem ha ki paidbah ha kane ka ilekshon”.
