Shillong, Naiwieng 04
Ka jingailad bad plie ïa ka surok ban ïaid ki kali na Them Ïew Mawlong sha Bimola ka la sdang biang naduh ka 4 tarik Naiwieng 2024 hadien hynriew snem ba la khang ïa katei ka surok. Ha kane ka sngi la sakhi ba ki nongñiah taksi ki la sdang ban ïaid na katei ka jaka hadien ba na ka liang ka Sorkar Jylla ka la pynmih ïa ka jingpynbna ban ailad noh ïa ki kali ba kin ïaid na ka jaka ba sah ki Harijan kaba la buh ban ïaid naduh ka por 8 baje mynstep haduh ka por 4 baje janmiet.
Kum ban shu kdew hangne, ki bor pynïaid distrik ka East Khasi Hills ha ka 30 tarik u Risaw 2024, ki la pynbna ban plie noh ïa ka jingïaid ki kali na ka surok jong ka Them Ïew Mawlong kaba pynïasoh ïa ka Ïew Mawlong sha Bimola kata naduh ka 4 tarik u bnai Naiwieng 2024.
Na ka liang U Nongsaiñ Hima, haba ïoh ban ïakren bad ki katto-katne ngut ki nongñiah taksi kiba ïaid na katei ka jaka, ki la pynsngew ïa ki jingeh jong ki ha kaba ïadei bad ka jingkhim eh ka por ïaid bad kumjuh ruh halor ka jingbym pynkynriah shuh ka Sorkar Jylla ïa ki jaidbynriew Harijan na katei ka jaka.
Haba ïoh ban ïakren bad u Bah Willson Wahlang, Secretary ka Nongmynsong Taxi Driver Association, u la ong ba ka jingshah biang jong ka Sorkar Jylla ban ailad ïa ki kali ban ïaid na katei ka jaka khlem da pynkynriah ïa ki Harijan na katei ka jaka, kan ap jingma biang namar haduh mynta ruh kam pat don satia kano-kano ka jingshong shngaiñ ha katei ka jaka.
“Ka jingpyllait ïa ki kali ka la biang palat hynrei ngi don ka jingeh ba lehse, kan wan biang ka jingjia kumba jia ha kito ki snem kiba la leit namar wat haduh mynta, ngi ïohi ba hangne kam pat don kata ka jingshngaiñ bad kumta, kum ki ‘riew paidbah ngi kyrpad ïa ka Sorkar ba ïa kine ki kharmetor nangne kam pat weng hynrei la pyllait noh ïa ka surok bad lashai lada ka jia kano-kano ka jingjia kaba sngewsih, mano ban bahkhlieh ïa kata”, ong u Bah Willson.
U Bah Willson u la ong ba ka jingkhang ïa katei ka surok la hynriew snem kynthih ka la wanrah jingjynjar shikatdei eh khamtam ïa ki nongñiah kali kamai namar ka jingdheng kali ha katei ka jaka ka long kaba jur bha bad baroh ki kali ki la hap ban ïaid na kajuh ka jaka. Nalor nangta u la ong ruh ba ka jingpyllait ïa katei ka surok tang naduh ka 8 baje mynstep haduh ka 4 baje janmiet, kan wanrah ka jingeh kaba khraw bha namar ka jingdheng kali ka long kaba dang jur bha khamtam ha ka 4 baje janmiet shaneng.
“Ka jingkyrpad na ka liang jong ngi ki ‘riew paidbah ka long ba phin pynjrong noh ïa ka por na ka 4 baje sha ka 7 baje, nga tharai kata ka la kham kylluid ka por ïa ki nongleit-nongwan khamtam ïa ngi ruh kiba ïaid nangne”, bynrap u Bah Willson.
Na ka liang u Bah Tom Nongbri, Publicity Secretary, u la kyntu ïa ka Sorkar ba kan weng noh ïa ki jaidbynriew Harijan ki ba shong-ba sah ha katei ka jaka khnang ban ïoh ka lad ban shna noh da kino-kino ki lad ai kam-ai jam ïa ki samla ha katei ka jaka.
Kumjuh, u Bah Nongbri u la kyntu ruh ïa ka Sorkar ba kan pynkhlaiñ ïa ki bor pahara ha katei ka jaka namar ka jingplie ïa katei ka jaka, kan sa wanrah ka jingmih shibun ki kam sniew kiba har rukom.
Shuh shuh kitei ki nongñiah taksi ki la pynpaw ruh ka jingsngew bynñiaw halor ka jingailad jong ka Sorkar Jylla ban ïaid kali na katei ka jaka tang haduh 4 baje janmiet bad ong ba ha ka por 4 baje, ka dang dei ka por ba ki khynnah skul ki dang mih na ki skul jong ki kumjuh ruh ki nongtrei ophis ki dang mih na ki jaka trei. Namar kata, ki la kyntu ïa ka Sorkar ba kan shah noh baroh shisngi ïa ki kali ban ïaid na katei ka jaka khnang ban duna ka dheng kali.
