Shillong, Naiwieng 04
Ka Meghalaya Energy Corporation Limited (MeECL) ka la pyn-khreh ban pyntreikam ïa ki sienjam ki ban ïarap ban lait na ka jingpynlip bording ilektrik wat ha ka aïom ba tyrkhong bha ka mariang.
Haba ïakren bad u Chairman-cum-Managing Director ka MeECL, u Sanjay Goyal, u la ong ba ka Corporation ka la pynkhreh ïa ki sienjam ki ban ïarap ban ym don ka jingpynlip bording ilektrik wat ha ki bnai ba rang tyrkhong namar ha ki bnai ba kham pahuh khamtam bym pyndonkam lut ïa ka bording, ka MeECL ka ïoh ban die ïa ka bording shawei pat.
Kumta u la ong ba lyngba ki sienjam kiba ka MeECL ka la shim, ka don ka jingsngew skhem ba kan ym don ka jingpynlip bording.
U la ong ba mynta u snem 2024 kam don ka jjngpynlip bording na ka daw ka jingduna bording, hynrei ki jingpynlip bording ki dei namarba hap ban shna ne maramot ïa ki KV line.
U Goyal u la pyntip ruh ba ka don ka jingpynlip bording naduh 9 baje mynstep haduh 3 baje janmiet ha kine ki san sngi namar ka jingshna ïa ka 33kv line ha kaba kin don katto-katne ki jaka kiba shah ktah namar ka jingdonkam ban pynlip ïa ka bording khnang ba ka jingpyntrei kan long kaba ïaid beit.
“Kane ka jingshna ka dei kaba leh da ka Grid, hynrei ngi la ïakren ban pyndep kham kloi ha shwa jong kine ki sngi kiba la buh khnang ban ym shah ktah than ki paidbah ha kito ki jaka ba hap ban pynïaid ïa ka kv line,” la ong u Goyal.
