Shillong, Naiwieng 04
Ka jingïakhih sangeh treikam ba khlem buh por jong ka NEHU Non-teaching Staff Association (NEHUNSA) kaba la sdang ha ka Lah Sngi U Blei kum ka dak ban pyrshah halor ka jingpynslem ban kyntiew kyrdan bad thung ïa ki kam ba sah thylli kiba la pynbna ha u snem ba la dep, ka la ktah shi kat dei ïa ka jingtreikam jong ka skulbah ha kane ka sngi.
U President ka NEHUNSA, Dr. W.R. Synrem haba kren sha ki lad pathai khubor, u la ong ba ki la ïoh jingtip ba u Vice-Chancellor, Prof. Prabha Shankar Shukla un sa khot ïakren ïa ki ha ka Sngi Ba-ar ha ka por 4 baje janmiet wat la u la kren shai ba ka seng kan ïai bteng ïa ka jingïakhih lada ka jingïakren bad u VC kam long kaba seisoh.
U Dr. Synrem u la ong ruh ba ka seng ka sheptieng ïoh ba katei ka jingpynbna thung kam na bynta ki kam ba lait (ba la pynmih ha ka 3 tarik u Naiwieng, 2023) kan kut noh hadien shisnem lada ka tnad pule-puthi ka Sorkar Pdeng kam pynjlan haba ïadei bad kane ka bynta.
“La pynbor ïa ngi ban ïaid shakhmat bad kane ka jingïakhih naba ka jingdon ki nongtrei (bym dei nonghikai) ha ka skulbah ha baroh ar tylli ki shlem pule – Shillong bad Tura ka la nang duna”, u la ong.
Kumba ka long mynta, u Dr. Synrem u la pynsngew ba ka jingdon ki nongtrei ka long tang kumba 250 ngut ha baroh ar tylli ki shlem pule da kaba bynrap ba palat 50 ngut ki nongtrei (bym dei nonghikai) ki la shongthait noh mynta u snem. Katkum ka jingong jong u, kin dang don shuh ki nongtrei (bym dei nonghikai) ki ban sa shongthait noh ha u snem ban wan. U President u la ïathuh ruh ba ïa ka jingpynïaid kam jong ka skulbah la pynïaid da katto-katne ngut ki nongtrei ba la skhem ha ka kam. U la ong ba ka skulbah ka lah ban ïakynduh jingeh lada ym leh eiei haba ïadei bad ka jingthung kam, ha kawei ka liang kaba lah ban ktah pat ïa ka jingpule bad ka lawei jong ki samla ka Jylla.
U President u la bynrap ba la khmih lynti ba u VC u dei ban don shane khamtam haba don kano-kano ka jinglong-jingman ha ka skulbah kaba donkam ban shimkhia mardor.
“Hynrei kaba sngewsih ka long ba u VC un don shabar lada ka skulbah ka don ha ka jingeh”, u la ong.
Kane ka jingïakhih ka la ktah ïa ki klas bad ka la pynlong ruh ïa ki kamra klas ha ki tnad pule bapher-bapher ban sah thylli. Kiba bun na ki kamra klas ki la sah thylli naba ym don bos ban kit ïa ki samla pule.
Kum ban shu kdew hangne, u VC um don shane bad la khmih lynti ba un wanphai mynta ka janmiet.
Lah ban pynkynmaw ba ka NEHUNSA ka la buh por ha kaba kut jong u Risaw ïa ki bor pynïaid ka skulbah ban pynmih ïa ka ‘Syllabus’ bad ka tarik ban pynlong ïa ka ‘Written Exam’. Na ka liang ka National Testing Agency (NTA) ka la dei ban pynlong ïa kane ka jingpynrung kam hynrei ka la pynsngew sha ka skulbah ha ka 16 tarik Naitung ba kan ym lah ban leh ïa kane.
