Shillong, Naiwieng 05
Ka Khasi Students’ Union – NEHU Unit (KSU-NU) ha ryngkat ka jingïatreilang bad ka NEHU – Students’ Union (NEHUSU) ha ka Sngi Ba-ar ki la sdang ïa ka jingïakhih shong kyllaiñ mungor bad jingshah thngan ba khlem buh por namar ka jingkuman u Vice-Chancellor ka NEHU, Prof. Prabha Shankar Shukla ban pynurlong ïa ki jingdawa jong ki.
Kine ar seng ha ka taïew ba la dep ki la ai por haduh ka shiteng synñia jong ka 4 tarik u Naiwieng ïa u VC ban weng kam noh shi syndon ïa u Registrar, Deputy Registrar lem bad kiwei pat kiba la shah kynnoh thung kam be-aiñ ha ka skulbah.
Ha kane ka sngi, ki samla pule ki la ïalum lang hakhmat Library jong ka skulbah ha shuwa ban sdang ïa ka jingïaid paidbah sha ka ophis treikam u VC.
U President ka KSU-NEHU Unit, samla S. Rymbai haba kren ha kane ka sngi u la ïathuh ba naduh ka por ba u Prof. Shukla u la wan ban pynïasoh kum u VC ka NEHU – ka kamram jong u ban peit ha ka ban wanrah ïa ki kam pynroi bad ka bha ka miat na bynta ki samla pule, lada phai ha baroh ki liang ka don hapdeng ka jingdkoh namar ka jingdkoh treikam jong uba hakhlieh duh ka skulbah.
Haba kdew halor ka jingnang hiar arsut jong ka kyrdan ka NEHU katkum ka NIRF, jong ka tnad pule-puthi ka Sorkar Pdeng, u samla Rymbai u la ong ba man ka por ba don ka jingïakhih lane ka mat kaba ka seng ka wanrah hakhmat u VC – u ju jah beit na ophis bad kumta ka seng kam banse ban shim ïa kum kine ki sienjam.
Haba pynsngew ïa katto-katne ki mat kiba ka KSU-NEHU Unit ka la wanrah hakhmat ka ophis treikam u VC, naduh ba u wan ha u snem 2022, u la ong ba ka seng ka la leit ban pynsngew ïa ki jingeh naduh ki ‘Hostel’, kamra klas sha u VC, hynrei wat hapdeng ka jingkular jong u ban pynbiang ïa ki jingdon-jingem hapoh ‘Hostel’, haduh mynta kitei ki jingdawa kim shym la urlong.
“Haba phai pat sha ka jingduna ki nongtrei (bym hikai) ha man la ki tnad pule…ha kine ki khyndiat sngi ba la leit, bun ki nongtrei ki la shongthait bad kane ka la pyndkoh ïa ka rukom treikam haba ngi leit sha ki tnad pule bapher-bapher ne Library,” u la ong.
Ynda la poi hakhmat ophis treikam u VC, ki samla pule ha ryngkat ki ‘placard’ ki la pyrta ïa ki sur jingpynrem pyrshah ïa u (VC) bad dawa ruh ba un hiar shuki, nalor ka jingphah leit phai noh ïa u Registrar.
Hadien kane, ka la don ka jingïakynduh hapdeng ki nongïalam ka NEHUSU bad KSU-NU bad u VC ha kaba ka la mih ka thma ktien kaba jur hapdeng kine ki arliang mamla ha ryngkat ka jingdawa phah hiar shuki ïa u VC na ka liang ki ar seng.
U Prof. Shukla uba la pynksan nia, haba pynphai ktien u la ong ba u long uba kloi ban wan ka jingtohkit la ka long ha kano-kano ka rukom.
“Ngim don jingshaniah shuh hapoh ka jingïalam jong phi, kumta ngi kyrpad ba phin hiar shuki noh lem bad u Registrar,” ong ki nongïalam ki ar seng ïa u VC uba la jubab ba kane ka bym lah long satia naba ka shong ha ka Sorkar.
“Hapoh ka jingïalam jong phi, ym ju long kam eiei…ym don jingkitkhlieh, ne jingkhuid jingsuba…kumta hiar shuki noh,” ki la ong.
Na ka liang u General Secretary ka NEHUSU, samla Toniho S. Kharsati haba kren sha ki samla pule hadien ka jingïakynduh bad u VC, u la ong ba ka seng ka la pynsngew halor ka dorkhas kaba la aiti ha u Nailur mynta u snem.
“U (VC) la ong ba un shim por ban lum thup lang ïa baroh kine ki dorkhas bad un sa ai ka jubab kaba biang…hynrei haba ngi la rah ïa kane kajuh ka dorkhas kaba la aiti ha u snem 2022 (da ka kynhun barim), u la ong ba ka dei ka jingbym lah jong u ban bud ïa ka,” u la ong.
Shuh shuh u samla Kharsati u la bynrap, “Lada um lah ban pynurklong ïa ka dorkhas kaba ngi la aiti ha u 2022, hato u lah ban pynrulong ïa kane kaba ngi ai ha u 2024.”
