Shillong, Naiwieng 05
U Myntri ba khmih ïa ka tnat Social Welfare uba dei ruh u nongaiktien ka Sorkar MDA-II, u Bah Paul Lyngdoh u la ong ba ka Sorkar kan wanrah ïa kawei ka kynhun ki pulit Anti Narcotic Task Force (ANTF) ki ban nym don jingïadei ei-ei bad kiwei pat ki kam jong ki pulit ka Jylla.
Haba kren hadien ka jingïakynduh bad ki nongïalam ka HYC, u Bah Paul u la ong ba kane ka jingtyrwa ban nym don jingïadei ki pulit ANTF bad kiwei pat ki pulit ka long ban pynduh ïa ka jingbym shaniah bad ka jingshah tharai sniew ki pulit.
“Ngi kwah ban pynduna ka jingshah tharai sniew ïa ka kam ba ki pulit ki trei, ka ba wanrah ïa ka jingduh jingshaniah, ngi donkam ïa kawei ka kynhun ki pulit ka ban pynleit jingmut beit thik tang ha ka jingïakhun pyrshah ïa u drok”, la ong u Myntri.
Haba kylli ban don ka jingthmu wanrah da kawei ka Batallion thymmai na ka bynta ban ïakhun ïa u drok, u Bah Paul u la ong kat ïa mynta ym pat lah ban ong ei-ei namar ïa kane hap ban ïapyrkhat ha ka jingïalang ha ka 14 tarik Naiwieng ba don lang u Symbud Myntri Rangbah ba khmih ïa ka Kam Pohïing (Police), ryngkat u Mission Director ka DREAM, u Bah FG Kharshiing Rtd. IPS.
“Ngin nym pat kyrkieh bad ngin ap haduh ka 14 tarik, hynrei nga pynpaw lypa ba ngin nym pyndon jingïadei ei-ei ïa ki pulit ANTF bad kiwei ki kam jong ki pulit jong ka Jylla”, u la ong.
