Shillong, Naiwieng 05
Ka jingkhih phaloh ha ka kam saiñpyrthei ha u snem 2023 kaba dei ruh ka ilekshon MLA sha ka ïingdorbar thawaiñ ka Jylla, ka la long kaba ishyrkhei haduh katta-katta. Ha utei u snem la sakhi ba ka la mih ka jingïakawang ktieh iwei-ïa-iwei bad ka jingkyntiap seng nawei shawei. Ïa kane la ju shem ba ka kham jur bha ha shwa kano-kano ka ilekshon la ka long ka ilekshon MLA ne MDC.
Haba ïoh ban ïakren bad u Bah Bindo M Lanong uba dei u MDC ba shu sieh hapoh ka KHADC bad uba dei ruh uwei na ki nongseng ïa ka seng riewlum hapoh ka Jylla, ka United Democratic Party (UDP), u la ong ba ka jingpynduh tiket jong ka UDP ïa u ha u snem 2023 ban ïakhun ïa ka ilekshon MLA na Nongkrem Konstitwensi bad ban ai pat sha u briew u bym dei na ka UDP kata ïa u Bah Lambor Malngiang ka la paw shai kdar noh hadien ka ilekshon namar ba u Bah Lambor Malngiang u la da mih noh na ka UDP.
Ha ki khyndiat sngi kiba dang shu dep ha ka jingïakren bad U Nongsaiñ Hima, wat la na ka liang u Bah Bindo u la pynpaw ba um sngewthikna shuh ban dang ïakhun ïa ka ilekshon ne ban dang ïai bteng ha ka kam saiñ pyrthei namar ba u sngew ba ka por jong u ka la dei ban shongthait noh na ka kam saiñ pyrthei bad ban sdang leh noh da kiwei pat ki kam shakri paidbah ha ka imlang-sahlang.
Ha kawei pat ka jingïakren bad u Bah Bindo, haba kylli lada jia ba u kylla pat ki jingmut-jingpyrkhat ban ïakhun la ka ïakhun ïa ka ilekshon MDC ha u snem 2025, hato un leit ban pan tiket na ka UDP ban ïakhun ïa ka ilekshon? U Bah Bindo u la ong ba ka long kaba sngewsih shi kat dei eh ban pyrkhat ha kaba ïadei bad ka UDP namar kum uwei na ki nongseng ïa ka UDP ha ka por jong ka ilekshon MLA ha u snem 2023, ka seng ka la pynduh tiket ïa u na Nongkrem bad ai pynban da u briew um dei na ka UDP.
“Lada ki ai ïa u briew uba dei na ka UDP, ngan shong hynrei ki la ai da u briew u bym dei na ka UDP bad kumta nga la ïaleh la ka ïaleh kum u kyrtong shimet hynrei pat nga la shah rem noh”, ong u Bah Bindo.
Kum ban shu kdew hangne, na ka liang ka UDP ka khlem ai tiket satia ïa u Bah Bindo ban ïakhun ïa ka ilekshon MLA na Nongkrem ha u snem 2023 hynrei ka la ai pynban ïa u Bah Lambor Malngiang ban ïakhun ïa ka ilekshon.
U Bah Bindo u la ïathuh ba wat hadien ba la dep ka ilekshon ha u snem 2023 ruh, u la thoh da ka shithi sha ka UDP ban klet noh ïa kiei-kiei baroh kiba la dep bad ïa long biang kumjuh.
U la ïathuh ba u la don jingthmu ban ïakhun ïa ka ilekshon MP mynta u snem bad ka jingshim rai jong u ruh ban ïakhun ïa ka ilekshon MP ka dei namar ba u la poi lut sha baroh ki jaka jong ka Ri Khasi bad Jaiñtia bad kumjuh ruh ka jingdon jong u ha ka kam saiñ pyrthei da ki phew snem, kan long ka jingmyntoi kaba khraw bha hynrei ha ka por ba u aplai ïa ka tiket MP na ka UDP, u khlem ïoh satia.
“Haba ka UDP ka khlem shym la ai tiket ïa nga, nga la rai ba kat ka MP ilekshon lada ngam ïoh tiket, ka shem shitom ban ïakhun kum u kyrtong shimet hynrei ka la ai pat da u bym dei hi u UDP”, ong u Bah Bindo.
U la ong ba ka UDP man la ka por ba ka ïakhun ïa ka ilekshon MP kam ju duna satia ïa ka 2 lak vote hynrei mynha kane ka ilekshon MP pat kaba dang shu dep, ka la hiar bha ha kaba ka la ïoh tang 50 hajar duna vote.
U la ong ba ha jingïalang bah jong ka UDP ruh kaba ju long shisien shisnem, ka UDP ka khlem khot satia ïa u bad ha ki lad pathai khubor pat, na ka liang ki nongïalam jong ka UDP ki la ong ba u Bah Bindo u dang don bad ka seng.
“Shisien ba ki khlem khot shuh ïa nga sha ka jingïalang jong ka seng kaba heh kaba ki ju khot wat ïa kiwei ki bym dei ki UDP kum ki nongshah khot sngewbha hynrei ïa nga pat ki khlem khot. Haba ki khlem shym khot shuh ïa nga hapoh ka jingïalang bah jong ka seng, nga shim ba ngam dei shuh u dkhot ka UDP. Ngam dei ma nga uba kyntait hynrei ki dei ma ki, kiba kyntait bad kumba ka long mynta, ka paw shai kdar ba ngam don ha ka UDP bad ym dei manga ba phet na ka UDP hynrei dei namar ba ki UDP kim shym ithuh shuh ïanga ha kaba ka la poi ruh haduh u pud ba ki katto-katne ngut kiba la ong ban weng noh ïanga kum u MDC shu sieh ruh”, bynrap u Bah Bindo.
U la ong ba kumba ka long mynta um dei shuh u dkhot jong ka UDP ne u dkhot jong kano-kano ka saiñpyrthei ruh hynrei u dei u bym don seng. U la ong ba wat la hapoh ka District Council u la shong bad ka UDP hynrei hadien ba ki khlem khot shuh ïa u sha ka jingïalang bah jong ka UDP, u la leit ban ai jingkyrshan noh ïa u CEM ka KHADC, u Bah Pynïaid Sing Syiem da kaba pynthikna ruh ba um don satia bad ka NPP hynrei ka dei tang ka jingai jingkyrshan ïa ka EC.
Haba kylli balei um leit pynïasnoh noh ïalade bad kiwei-kiwei ki seng saiñpyrthei, u Bah Bindo u la ong ba um dei u briew uba shim kabu ban leit sha kino-kino ki seng tang namar ba ki la paw ne sdang kiew.
“Ngam dei u briew uba shim kabu, na kata ka daw nga la dei ban leit sha ka Congress naduh ba sdang mynshwa khamtam lei-lei ka dei ka seng kaba don ha baroh kawei ka Ri India bad ka Congress ka la synshar ruh ha ka Jylla Meghalaya la bun tylli ki snem hynrei ngam dei u ‘riew shim kabu bad ki la khot ïa nga sha ka Congress naduh kita ki por hynrei ngam shym treh ban leit sha ka Congress ne wat sha kiwei-kiwei ki seng”, bynrap u Bah Bindo.
