Shillong, Naiwieng 05
Ka MP barim na Tura, ka Agatha Sangma ka la shimti kum ka Chairperson bathymmai jong ka Meghalaya State Commission for Protection of Child Rights (MSCPCR) ha ka Sngi Ba-ar, ha kaba ka la leit ban ïakynduh ruh ïa u Myntri ba khmih ïa ka tnat Social Welfare, u Bah Paul Lyngdoh.
Ka Agatha ka la shah thung kum ka Chairperson jong ka MSCPCR ha ka 9 tarik Nailur mynta u snem, hynrei ka la shimti ïa katei ka shuki ha ka Sngi Ba-ar ka 5 tarik u Naiwieng, hadien ar bnai duna ba la pynmih ïa ka jingpynbna. Ka la ong ba ka jingkham slem jong ka ban shimti ïa katei ka kam ka long namar ba kam don ha ka met kaba shait ba khlaiñ.
Haba pynpaw ïa ka jingsngew jong ka ha ka sngi ba nyngkong ba ka la shimti ïa ka kam, ka Agatha ka la ong ba ki Chairperson barim jong ka Commission ki la leh bun kiei kiei bad ki dang shibun ruh kiba ma ka kan hap ban dang leh.
Ha kaba ïadei bad ka jingkiew ki kam bymman pyrshah ïa ki khynnah, ka la ong ba donkam ïa ka jingïatreilang na baroh ki liang ban wanrah ka jingshngaiñ ïa ki khynnah.
“Nga kmen ba nga don ha kane ka shuki mynta, namar ki khynnah ki dei ki briew kiba nga sngewtynnat tam ha ka pyrthei. Ha kaba ïadei bad ka jingshngaiñ ki khynnah baroh ngi don ha kajuh ka liang bad ngi hap ban ïatreilang”, ong ka Agatha.
Ha kawei ka liang, ka Agatha kaba dei ka para trai jong u Myntri Rangbah ka Jylla, ka la kyntait ïa ka jingkynnoh ba ka jingthung ïa ka ha katei ka shuki ka dei kaba la leh donbor. Ka la ong ba kam don eiei ban kren halor ki jingkynnoh, hynrei ki kam jong ka kin sa kren hi kham jam.
