Khliehriat, Naiwieng 05
U Deputy Commissioner (DC) ka East Jaiñtia Hills u la pynmih ïa ka jingbthah ha ka 5 tarik Naiwieng ban kyntu ïa ki paidbah nongleit-nongwan khamtam ïa ki kali ba kin long kiba husiar bad ban bud ryntih ïa ki jingbthah da ki bor pynïaid kali haba ki ïaid lyngba ki jingkieng kiba la tor ha ka surok bah NH-6 hapoh ka district.
Kane ka jingmaham ka la wan jia ruh hadien ba la ïoh ïa ki jingtip ba ka jingkieng kaba don ha surok bah NH-6 ha Umkiang Wahkoh bad kiwei ki jingkieng ha shilynter ka surok bah NH 6 kiba hap hapoh Lumshnong C&RD Block ki la tor bad synjor bad kiba buh jingma shibun ïa ki paidbah nongleit nongwan khamtam ïa ki kali kiba ïaid lyngba kine ki jingkieng.
Kumta khnang ban khmih na ka bynta ka jingshngaiñ jong ki nongleit nongwan bad ki kali kiba ïaid lyngba kane ka surok, u DC u la bthah ïa u Project Director National Highway Authority of India (NHAI), Meghalaya, Shillong ban shim mardor ïa ki sienjam ban maramot ïa kine ki jingkieng namar ki dei ki lynti ïaid ba kongsan bha na ka bynta ka thaiñ baroh kawei.
Kane ka jingbthah kaba la pynmih u DC ka dei ka sien kaba ar tang hapoh shibnai halor ka jingtor ka jingkieng ha ka surok bah NH 6.
