Mairang/Jowai, Naiwieng 05
Ki nongshong shnong bad ki nongrep ha ka 5 tarik u bnai Naiwieng 2024 ki la mad ïa ka jingsngewsih kthang hadien ka jingther tyngeh jong u phria kaba pynlong ïa bun ki mar rep jong ki ban julor lut khait.
Katkum ka tyllong khubor ba la ïoh lum la ong ba katei ka jingjia ka la jia ha ki bynta jong ka Eastern West Khasi Hills District kiba kynthup ïa ka shnong Maroid, Mawpen Nongthymmai, Thang-maw, Rikhen bad kiwei shnong ba marjan ha kaba ki la mad ïa ka jingsngewsih kaba jur na ka daw ka jingther u phria ba jur uba la pynjulor ïa ki mar rep khamtam eh ïa u kba.
La ong ba katei ka jinghap jong u phria ka la jia ha ka por kumba 1 baje shiteng sngi eiei kaba ïai bteng ha ki bynta jong kitei ki shnong bad pynlong ïa ki jingthung jingtep baroh naduh u sohsaw, sohmynken, ki jhur ki la julor lut khamtam eh ïa u kba uba la ih bad ba la dei ka por ban ot ha kaba la ong ba baroh ki lyngkha kba ki la julor bad ki soh kba ruh ki la hap lut.
Ka khubor na ki nongshong shnong ka thaiñ Mawpen, Nongthymmai ki la ïathuh ba ki jingthung naduh ki jhur u biskot bad khamtam eh u kba ki la shah ktah jur ha kane ka jingwan hap jong u phria ba jur ha kaba ki soh kba ki la hap lut plaiñ bad kumjuh ruh u biskot uba ki im ban kamai ki la hap lut.
Shuh shuh ki nongrep ki la pynpaw ïa ka jingsngewkhia kaba jur bad kyntu ïa ki bor ba halor khamtam ïa ka Sorkar ba kan phai khmat lem ban ai ki lad jingïarap.
Ha ka shnong Thangmaw pat, u Sordar ka shnong Bah T Lyngdoh, u la ïathuh ba ki jingthung naduh u kba, u sohsaw, u sohmynken bad ki jhur ki jhep ki la julor lut ha katei ka jingwan lynshop jong u phria hynrei ym shym la don ki ïing ki sem ki ban shah ktah.
Nalor kane, u la ong ruh ba halor katei ka jingjulor jong ki mar rep bad ka jingshah ktah jong ki mar rep, u la dep ban pyntip ruh sha ka ophis jong ka BDO Mairang Block bad kumjuh ruh hapoh ka tnat ka rep ka riang ba kin wan jurip bad shim jingkheiñ ïa ki lanot ba la shah ktah ha katei ka jingwan lynshop jong u phria.
Haba phai pat sha West Jaintia Hills, ki nongrep ka shnong Pynthorlangtein, Mustem, Muphlang bad Ïongnoh kiba hap hapoh ka West Jaiñtia Hills ki la mad ïa ka jingsngewsih kthang hadien ba u slap ryngkat bad u phria ki la ban wan ther tang katto-katne minit bad pynjulor lut ïa u kba uba ki la trei shitom baroh shisnem.
Haba ïakren bad u Waheh Shnong ka Pynthorlangtein u Bah Armimus Lipon bad Waheh Shnong Mustem u Bah Heimon Shylla kumjuh Waheh Shnong Muphlang u Bah Wallambha Shylla, ki la ïathuh ba ka jingther u slap ha ryngkat u phria ka la jia ha ka por kumba 2:20 baje nohphai sngi.
Une u phria u rben kumba 4-5 inshi bad ka la theh umpjah shisyndon ïa ka jingtrei shitom jong ki paid nongrep baroh saw aïom ha kaba u kba uba sah sa tang ban lum u la hap lut sha madan.
U Waheh Shnong Muphlang, Bah Wallam Shylla, u la ïathuh ba bun ki longïing ha ka shnong jong u, ki la pyntip ba ki la duh lut ïa u kba bad mynta kim thikna shuh kumno ban leh, nalor kata don ruh katto-katne ki longïing kiba la julor ki tnum ïing kiba ym pat ïoh jingkheiñ kaba thikna.
Halor kane ka jingjia, u la pyntip sha u Block Development Officer bad sha u Gram Sevak da ka jingkyrmen ba ka Sorkar kan kner ïa ka kti jingïarap sha ki nongrep kiba la mad ïa kane ka jingduh kaba khraw.
