Shillong, Naiwieng 05
Ka MP barim jong ka Tura Parliamentary Constituency, ka Agatha Sangma ka la ong ba kam dei kaba bakla ïa u Myntri Rangbah, u Conrad K Sangma bad ka kynhun Myntri jong ka Sorkar ba kin leit ïalap ilekshon ha Gambegre, namar ha ka por ilekshon barabor hap ban leit pan ‘vote’ na ki paidbah.
Kane ka jingkren ka Agatha ka long halor ka jingkynthoh jong u MP ba mynta uba dei u nongïalam ka seng Congress, u Saleng Sangma uba la ong ba u Myntri Rangbah ryngkat ka Kynhun Myntri ki la leit rung tyngkong ïing ha man la ki kyndong-kynshrot ha Gambegre.
Haba kren bad ki lad pathai khubor ha Shillong, ka Agatha kaba dei ka para trai u Myntri Rangbah ka la ong ba ha ka ilekshon kane ka rukom kren jong u Saleng ka long ka bym sngew ïahap, namar ki briew kiba don ha ka saiñ pyrthei barabor ki hap ban leit pan ‘vote’ na ki paidbah.
“Ngi hap ban trei shitom bad ïalap tyngeh ha ka ilekshon, kam don eiei kaba bakla ïa u Myntri Rangbah bad kiwei ki Myntri ban leit pynlut por bad ïalap na ka bynta ka kyrtong jong ka seng”, ka la ong.
Ka la ong ba kane ka jingleit hi da u Myntri Rangbah bad ka Kynhun Myntri ban ïalap ilekshon ka pyni ïa ka jingshim khia wat la ka dei tang kawei ka ilekshon kaba rit ban pynthikna ïa ka jingjop bad ban pyni ruh ba u Myntri Rangbah u don bad ki paidbah ka Gambegre.
“Kaei kaba ngi la ïoh jinghikai na ki ilekshon ha ki por ba la dep, ka long ba ym dei ban kheiñ sting wat ïa kawei ka ilekshon ruh”, la ong ka Agatha.
Ha kajuh ka por ka Agatha ka la ong ba ka NPP ka la ïoh ïa ka jingshaniah na ki paidbah ha Gambegre, bad lehse ki paidbah ki la ïohi ïa ki kam jong u Myntri Rangbah bad ïa ki kam ba ka Sorkar ka la leh.
“Nga sngew ba ki paidbah ka Gambegre ki kwah ban ïoh ïa ka MLA kaba don hapoh ka Sorkar, ka ban ïarap pynïoh ïa ki kam pynroi bad ki skhim kiba bun”, ka la ong shuh shuh.
